Aqtóbe oblysynda raqymshylyqqa ilikkender jumysqa ornalasýǵa asyǵar emes
Bıyl Aqtóbe oblysy boıynsha 122 adam raqymshylyqqa ilikti. Oblystyq jumyspen qamtý jáne áleýmettik baǵdarlamalar basqarmasyna 76 adamnyń tizimi kelip túsken. Olar taıaý ýaqytta abaqtydan shyǵyp, otbasyna oralady.
«Bostandyqqa shyǵatyndardyń 13-i aýyr emes, 63-i ortasha aýyr qylmys jasaǵan. Abaqtydan shyǵatyndardyń 30-ǵa jýyǵy jastar. Arasynda bir zeınetker bar. Bizdiń mindetimiz osy adamdarǵa jumys usynyp, eńbekke aralastyrý. Qazirgi ýaqytta aspaz, temir ustasy, kólik júrgizýshisi, kúzetshi sekildi 200-den astam bos jumys orny usynyldy. Olarǵa 50 myń teńgeden astam jalaqy beriledi. Túrmeden bosap shyqqandardy mindetteı almaımyz, biraq olar únemi baqylaýda bolady», - deıdi oblystyq jumyspen qamtý jáne áleýmettik baǵdarlamalar basqarmasynyń basshysy Qaırat Otarov.
Aqtóbe oblysy boıynsha 4 adam túrmeden bosap shyqty. Olardyń ekeýi qalada, ekeýi aýdandarda turady. Eshqaısysy da jumyspen qamtý ortalyǵyna kelip, tirkelmegen. Tipti, arnaıy mamandyqtary da joq.
«Túrmeden bosap shyqqandar úshin memleket arnaıy kvota bólip otyr. ıAǵnı, olardyń jumysqa ornalasýy úshin bar jaǵdaı jasalady. Al arnaıy mamandyǵy joq adamdar qysqa merzimdi kýrstarda oqytylady. Bul jumysqa bıyl 219 mıllıon teńge bólindi. Aýyldan qalaǵa kelip bilim alatyndar úshin shákirtaqy taǵaıyndalyp, páterine, jolyna aqsha beriledi. Bul kvotada qarastyrylǵan qamqorlyq», - deıdi Qaırat Otarov.
Aıta keteıik, ótken jyly túrmeden bosap shyqqan 264 adamnyń 92-si usynylǵan jumystan bas tartqan. Olardyń bir bóligi kelisimshartsyz, jaldamaly jumysqa kirgen, bir bóligi densaýlyǵyna baılanysty múlde eńbek etýden bas tartqan. Tipti, jalaqysy az degen syltaý aıtqan 33 adam jumystan bas tartty. Al ekeýi qaıta sottalyp ketti.
Altynaı Saǵyndyqova
