Aqtóbe oblysynda Prezıdenttiń aýyldyq aýmaqtardy damytýǵa qatysty Jarlyǵy iske asyryla bastady

AQTÓBE. QazAqparat - Prezıdent Qasym-Jomart Toqaevtyń jańa merzimdegi alǵashqy Jarlyǵy aýyldardy damytý jóninde boldy. Aqtóbe oblysy Memleket basshysynyń osy tapsyrmasyn oryndaýǵa alǵashqylardyń biri bolyp kiristi, dep habarlaıdy QazAqparat.

Búgin «AMANAT» partııasynyń tóraǵasy Erlan Qoshanovtyń qatysýymen ótken jıyn barysynda aýyldyq aýmaqtardy damytýǵa qatysty óńirde qabyldanyp jatqan sharalar qaraldy.

Atap aıtqanda, árbir aýyldyń múmkindikterin anyqtaý maqsatynda skrınıng júrgizilip, barlyq 134 aýyldyq okrýgtiń áleýmettik-ekonomıkalyq damý jospary ázirlendi.

Oblysta aýyl turǵyndarynyń ál-aýqatyn arttyrý úshin 2022 jyly «Aýyl amanaty» jobasy júzege asyryldy, oǵan 3 mlrd teńge qarjy bólingen bolatyn. Baǵdarlamanyń birinshi kezeńinde 24 aýyldyq okrýg 2 772 jobany qolǵa aldy. Al bıylǵy jyly qosymsha 3,5 mlrd teńge bólindi.

Jobany iske asyrý nátıjesinde jumyssyzdar sany 41,4%-ǵa, ataýly áleýmettik kómek alýshylar sany 49,3%-ǵa azaıyp, otbasynyń ortasha tabysy 192%-ǵa artady dep kútilýde.