Aqtóbe oblysynda ótken jyly 101 jasóspirim qyz júkti bolyp qalǵan
AQTÓBE. QazAqparat - Aqtóbe oblysynda ótken jyly 101 jasóspirim qyz júkti bolyp qaldy. Onyń ekeýi - 14 jastaǵy oqýshy, dep habarlaıdy QazAqparat tilshisi.
Aqtóbe oblysy boıynsha 2018 jyly 101 jasóspirim júkti boldy. Júkti bolǵan qyzdardyń 57 paıyzy - qala, 43 paıyzy - aýylda turady. Balalar gınekology Saltanat Tobylbaevanyń aıtýynsha, júkti jasóspirimderdiń 90 paıyzǵa jýyǵy - 17-18 jasta, kámelet jasyna tolǵan. Al 11-i - 16 jasta, ekeýi - 15 jáne ekeýi - 14 jasta boldy.
«Júkti qyzdardyń 73 paıyzy tolyq otbasynan shyqqan, ata-anasy bar. Al 27 paıyzy tolyq emes otbasynan tirkeldi. Al 6 qyz ótken jyly júktiligin úzdi. Sebebi, 14-15 jasynda balany saqtap qalý qyzdardyń densaýlyǵyna qaýip tóndiredi. Negizi 18 jasqa tolmaǵan qyzdar gınekolog dárigerge ata-anasymen birge kelýi kerek. Eger jasóspirim júkti bolsa, ony saqtaý, úzý tek ata-anasynyń ruqsatymen, qamqorshysynyń kelisimimen jasalady. Dáriger retinde aıtarym, otbasynda tárbıe joq. Buryn balalar sóılesip, ishindegini aıtsa, qazir balalar ózi týraly syr ashpaıdy, tuıyq. Óz problemalarymen ońasha qalyp qoıǵan», - deıdi balalar gınekology Saltanat Tobylbaeva.
Aqtóbe oblysynda jyl basynda oqýshy qyzdyń júkti bolǵany anyqtaldy. Gınekolog dáriger Gúlnar Janbosynovanyń aıtýynsha, qańtarda oqýshy qyz tekserilýge kelgen.
«Kámelet jasyna tolmaǵan qyz keńes alýǵa keldi. Ol turǵylyqty mekenjaıy boıynsha gınekolog dárigerge qaralýy tıis. Dárigerlik keńes komıssııasyna da shaqyrylady. Dárigerler júktilikti saqtaý nemese úzý týraly sheshim qabyldaıdy. Ata-anasymen kelmegen soń qaramaı, turǵylyqty mekenjaıyna jiberdim. Sodan beri habar joq», - deıdi Gúlnár Janbosynova.
Aıta keteıik, balalar gınekology kámeletke tolmaǵan júkti qyzdardy anyqtaǵan kezde birden oblystyq densaýlyq saqtaý basqarmasyna jiberedi. Al densaýlyq saqtaý basqarmasy polıtsııaǵa habar beredi.
