Aqtóbe oblysynda órtengen avtobýs ıesiniń lıtsenzııasy bolmaǵan
ASTANA. QazAqparat - QR Investıtsııalar jáne damý mınıstrligi Aqtóbe oblysynda 52 adamnyń ómirin qıǵan jan túrshigerlik jol apaty týraly málimetterdi jarııalady, dep habarlaıdy «QazAqparat» HAA tilshisi mınıstrliktiń baspasóz qyzmetine silteme jasap.
Vedomstvo bergen málimetterge qaraǵanda, oqys oqıǵa 2018 jylǵy 18 qańtar kúni 10:30-da (Astana ýaqytymen) «Samara-Shymkent» avtojolynyń 1068-shi kılometrinde, Qalybaý aýylynan (Aqtóbe oblysy, Yrǵyz aýdany) 10 km qashyqtyqta bolǵan. Aldyn ala málimetter boıynsha 57 adam zardap shekken, sonyń 52-si opat bolyp, bes jolaýshy (barlyǵy Ózbekstan Respýblıkasynyń azamattary) óz kúshimen kólikten shyǵyp úlgergen. Avtobýs Shymkent (QR) - Qazan (RF) baǵdarymen halyqaralyq tasymaldy júzege asyryp kelgen.
«Órt ornyna Apat medıtsınasy ortalyǵynyń kúre joldaǵy medıtsınalyq-qutqarý beketteri (4 adam jáne 1 tehnıka), «QazAvtoJol» AQ ókilderi (5 adam jáne 4 tehnıka), Yrǵyz aýdandyq TJ bólimshesiniń basshysy, Yrǵyz aýdanynyń №9 órt sóndirý bólimi (4 adam jáne 1 tehnıka), «Órt sóndirý qyzmeti jáne apattan qutqarý jumystary» MM Qarabutaq aýylyndaǵy №7 órt sóndirý bólimshesiniń órt sóndirý beketi (5 adam jáne 1 tehnıka) jiberildi. Oqıǵa orny oblys ortalyǵynan 320 km-de», - delingen habarlamada.
Sonymen qatar mınıstrliktegilerdiń habarlaýynsha, órtengen, 1989 jyly shyǵarylǵan KassbohrerSetra (H335RSM, 59 adam syıatyn) avtobýsy Mehtıev Ordýhan Sabıroǵlyna tıesili bolǵan. Turaqty baǵdarlardyń tiziminde ol joq. Turaqty emes jolaýshy tasymalyna lıtsenzııa almaǵan (jalǵa alý negizinde jumys istegen bolýy múmkin). Mindetti tehnıkalyq tekserý: 2015 jylǵy 17 tamyz («Iskakov N.E.» JK TQO, Shymkent qalasy), aıaqtalý merzimi: 2016 jylǵy 17 aqpan.
