Aqtóbe oblysynda munaı ken oryndarynyń júrgizýshileri jumysqa shyqpaı qoıdy

AQTÓBE. QazAqparat – Búgin Aqtóbe oblysyndaǵy Jańajol jáne Keńkııaq munaı ken oryndarynda qyzmet etip júrgen 80-ge jýyq júrgizýshi qyzmet kórsetý tarıfin kóterý, jalaqyny arttyrýdy talap etip, jumysqa shyqpaı qoıdy. Vıdeo áleýmettik jelide taraǵan, dep habarlaıdy QazAqparat tilshisi.

Júrgizýshiler «SPNS Aqtóbemunaıgaz» AQ úshin qosalqy merdigerlik qyzmetin kórsetýmen aınalysatyn «SNPS-Avtotransportnaıa kompanııa» kompanııasynda jumys isteıdi.

«80-ge jýyq júrgizýshi tańerteń jumysqa shyqpaı qoıdy, sodan keıin olardyń sany 65-ke jetken. Bul — jeńil kólik júrgizýshileri. Jumysqa tapsyrys berýshi «SPNS-AMG», al «SNPS-Avtotransportnaıa kompanııa» - onyń merdigeri, onyń qosalqy merdigerliginde kóliktik qyzmet kórsetetin, djıpter, jeńil kólikter men arnaıy tehnıkany usynatyn alty JShS pen JK bar. Búgin tehnıka jaı tur, júrgizýshiler jumysqa shyqpady. Olar kórsetip otyrǵan qyzmetiniń tarıfin kóterýdi talap etýde. Olardyń aıtýynsha, tarıfti dızel otyny baǵasynyń kóterilýi sebebimen aýystyrý kerek. Bul jaǵdaı týraly biz áleýmettik jeli arqyly bildik. Júrgizýshiler bizdi de, tapsyrys berýshilerdi de ol týraly eskertken joq. Oqıǵa ornyna basqarmamyzdyń, prokýratýra jáne oblystyq ákimdik qyzmetkerleri shyqty, olar júrgizýshilermen sóılesip, máseleni keshke deıin sheshýi tıis», - deıdi Aqtóbe oblystyń Eńbek ınspektsııasy basqarmasy bastyǵynyń orynbasary Talǵat Iskarın.

Júrgizýshilerdiń ortasha jalaqysy – 200 myńǵa jýyq teńge, olar jalaqyny eki ese arttyrýyn talap etip otyr.