Aqtóbe oblysynda mobıldi toptardyń jumysy kúsheıtiledi
Ótken táýlikte Aqtóbede bir ǵana adamnan vırýs anyqtaldy. Ol derttiń sımptomdy túrine shaldyqqan.
Jalpy indet bastaǵan kúnnen beri 4 myńnan astam jaǵdaı tirkeldi. Onyń 95 paıyzy jazyldy.
Dárigerler men epıdemıolog mamandar ári qaraı da bul baǵyttaǵy jumysty óz baqylaýynda ustaıdy.
Sebebi óńirde úı karantınine alynǵan adamdar sany 600-den asyp ketken. Bári de naýqas adamdarmen baılanysta bolǵany úshin dárigerlerge densaýlyǵy týraly aqparat berip otyr.
«Búgin koronavırýs ınfektsııasyn juqtyrǵan bir jaǵdaı tirkeldi. Anyqtalǵan naýqastardyń arasynda Reseı men Qazaqstannyń ózge óńirlerinde jumys isteıtin aqtóbelikter bar. 14 adam karantın statsıonarynda. 585 medıtsına qyzmetkerine vaktsına egildi»,- dedi oblys ákiminiń birinshi orynbasary Nurjaýǵan Qalaýov. Ol óńirdegi baqylaý toptarynyń jumysyn qatań synǵa aldy. Barlyǵy 47 baqylaý toby qurylǵan. Bári 10 myńǵa jýyq tekserý júrgizip, 2 myń adam ákimshilik jaýapqa tartyldy. Olarǵa 184 mln teńge aıyppul salyndy. «Aqpan aıynda Aqtóbe qalasynda anyqtalǵan zań buzýshylyqtar sany birneshe esege azaıǵan. Buǵan baqylaýdyń álsizdigi dálel», - dedi N.Qalaýov.
Jıynda oblys ákimi toptardyń jumysyn jandandyrýdy, halyq arasynda ekpe jónindegi aqparattandyrý-túsindirý jumystaryn kúsheıtýdi tapsyrdy.
«Sanıtarlyq-epıdemıologııalyq jaǵdaıdy turaqty dep aıtýǵa bolmaıdy. Ol kez kelgen sátte nasharlap ketýi múmkin. Baqylaý toptary shekteý sharalaryn buzýshylarǵa qatysty sharalardy qoldana otyra, jumysyna jaýapkershilikpen qaraýy qajet. Qaýip seıilgen joq»,- dep atap ótti Ońdasyn Orazalın.
Aıta keteıik, Aqtóbede tósek-oryn sanyn 445-ten 3603-ke deıin kóbeıtýǵa múmkindik bar.
Emdeý ornyndaǵy kereýettiń 80,3% ottegimen qamtylyp. 21 statsıonarlyq rentgen apparaty ornatyldy.
Ókpeni jeldetetin 382 apparat, 450 ottegi kontsentraty, 626 ottegi ballony, 787 Bobrov apparaty men 424 ottegi jastyǵy bar.
Jedel járdem beketi men emdeý mekemeleriniń avtoparki 41 sanıtarlyq mashınamen tolyǵyp, 6 mobıldi dıagnostıkalyq keshen satyp alyndy.