Aqtóbe oblysynda medıtsınalyq qurylǵyny 4 ese artyq baǵamen satyp alǵan – Bas prokýratýra

ASTANA. QazAqparat – Aqtóbe oblysynda jyljymaly shuǵyl medıtsınalyq kómek kesheni (jedel járdem) kedendik qunynan 4 ese artyq baǵamen satyp alynǵan.

Bul týraly búgin Bas prokýror Berik Asylovtyń tóraǵalyǵymen alqa otyrysynda málim boldy, dep habarlaıdy QazAqparat vedomstvonyń baspasóz qyzmetine silteme jasap.

Jıynda jer salasyndaǵy zańdylyqty saqtaý, sondaı-aq medıtsınalyq buıymdardy satyp alý máseleleri qarpalǵan.

Ekinshi másele boıynsha «Dárilik zattar men medıtsınalyq buıymdardy saraptaý ulttyq ortalyǵynyń» qyzmeti tekserisiniń nátıjeleri talqylandy.

Prokýrorlyq tekseris kezinde bıýdjet qarajatyn jymqyrý jáne joǵary baǵamen sapasyz medıtsınalyq tehnıkany satyp alý faktileri anyqtaldy.

Máselen, Aqtóbe oblysyndaǵy medıtsınalyq ortalyq jyljymaly shuǵyl medıtsınalyq kómek keshenin (jedel járdem) kedendik qunynan 4 ese artyq baǵamen satyp alynǵan. Naryqtyq baǵasy 16,6 mln teńge bolsa, ortalyqqa 72,9 mln teńge jumsalǵan.

Osyndaı jáıtter Almaty qalasynda, Aqmola, Atyraý, Qaraǵandy, Qostanaı, ShQO, BQO, Jambyl jáne Pavlodar oblystarynan da anyqtaldy.

«Tekseris nátıjeleri boıynsha prokýratýra zań buzýshylyqtaryn joıý týraly 208 usyný engizdi, 405 adam tártiptik jáne ákimshilik jaýapqa tartyldy, 15 sotqa deıingi tergep-tekserý bastaldy»,-delingen habarlamada.

Otyrys barysynda paıdalanylmaı jatqan 1,5 mln gektar jerdiń memleketke qaıtarylǵany aıtyldy.