Aqtóbe oblysynda medıtsınalyq kómektiń sapasy jaqsardy – áleýmettik medsaqtandyrý qory
AQTÓBE. QazAqparat – Aqtóbe oblysynda kórsetiletin medıtsınalyq kómektiń sapasy artyp kele jatyr. Óńirlik kommýnıkatsııalar qyzmetinde ótken baspasóz konferentsııasynda áleýmettik medıtsınalyq saqtandyrý qorynyń ókilderi medıtsınalyq qyzmetterdiń sapasy men kólemine jasalǵan monıtorıng nátıjeleri týraly aıtty, dep habarlaıdy «QazAqparat» HAA tilshisi.
Áleýmettik medıtsınalyq saqtandyrý qory - medıtsınalyq qyzmetterdi tóleýshi jáne strategııalyq satyp alýshy. Búgingi kúnde Aqtóbe oblysynyń turǵyndaryna tegin medıtsınalyq kómektiń kepildendirilgen kólemi aıasynda atalǵan kómekti 37 memlekettik jáne 26 jeke emhana kórsetedi. Jeke jáne memlekettik emhanalardyń qyzmet kórsetý aqylary kórsetilgen qyzmettiń sapasy men kólemi monıtorınginiń nátıjelerin esepke ala otyryp júrgiziledi.
Aqtóbe oblysynyń medıtsınalyq uıymdaryna monıtorıng júrgizý barysynda áleýmettik medıtsınalyq saqtandyrý qorynyń fılıaly 2019 jyldyń 11 aıynda medıtsınalyq kómektiń barlyq túri men formasy boıynsha jalpy somasy shamamen 300 mıllıon teńgege 28 myńnan astam aqaýlardy anyqtaǵan.
«Medıtsınalyq kómektiń barlyq túri men formasy boıynsha 28 myńnan astam aqaýlardy annyqtadyq. Bular: dıagnostıka men emdeý hattamalarynyń tolyǵymen oryndalmaýy, dıspanserlik esepke ýaqytyly almaýy jáne taǵy da basqa zań buzýshylyqtar. Osy aqaýlar boıynsha biz medqyzmettiń somasynan 10-nan 30 paıyzǵa deıin ustap qaldyq.
Sondyqtan da aımaqtyń medıtsınalyq uıymdary kórsetiletin medıtsınalyq qyzmettiń sapasyn únemi arttyrýǵa tyrysady. Bul óz kezeginde zań buzýshylyqtardyń azaıýyna ákelip, medıtsınalyq qyzmettiń sapasyn arttyrýǵa apardy», - dep sanaıdy qor fılıal bóliminiń basshysy Gúlzada Túlkibaeva.
Eske sala keteıik, 2020 jyldan bastap respýblıka boıynsha mindetti áleýmettik medıtsınalyq saqtandyrý júıesi engiziledi. Onyń aıasynda azamattar tegin medıtsınalyq qyzmetterge qol jetkize alady, biraq saqtandyrýdy almaǵan adam tek medıtsınalyq qyzmettiń kepildendirilgen kólemin ǵana alady dep atap ótti qor ókilderi.
Ár adam óziniń saqtandyrylǵanyn nemese saqtandyrylmaǵanyn «MÁSQ» KEAQ-nyń www.fms.kz resmı saıtynan JSN nómiri boıynsha teksere alady.
