Aqtóbe oblysynda medıtsına mamandary koronavırýstan egilýde
AQTÓBE. QazAqparat – Aqtóbe oblysynda koronavırýsqa qarsy 1 myń doza vaktsına jetkizilip, dárigerler ekpe qabyldap jatyr, dep habarlaıdy QazAqparat tilshisi.
Keshe elimizge «Spýtnık V» vaktsınasy jetkizildi. Іle-shala óńirler suranysy boıynsha ár aımaq ózine tıesili vaktsına dozasyn qabyldap aldy. Aqtóbege 1 myń danasy ákelindi.
Oblystyq Densaýlyq saqtaý basqarmasynyń basshysy Rústem Isaev qaýipsizdik úshin áýejaıǵa baryp, «Spýtnık V» ekpesin jetkizý, túsirý, tıeý jumystaryn baqylady. Odan ári vaktsına qoımaǵa jetkizildi. Talap boıynsha bári tońazytqyshqa ornalastyryldy. Sol jerden oblystyq balalar aýrýhanasynda tasymaldanyp, qalanyń 8 emhanasyna bólindi.
«Qazir bizde «qyzyl» aımaqta 960 medıtsına qyzmetkeri jumys isteıdi. Birinshi sol qyzmetkerler qabyldaıdy. Ózim de qabyldadym. Jaǵdaıym jaqsy», - dedi oblystyq Densaýlyq saqtaý basqarmasynyń basshysy Rústem Isaev.
Sonymen birge kishi medıtsına qyzmetkerleri de alǵashqy bolyp vaktsınalandy.
«Tańerteń saǵat 10:23-te vaktsına qabyldadym. Keıin 30 mınýt tynyqtym. Bári jaqsy. Qandaı da bir keri áserin baıqamadym. Aldymen medıtsına qyzmetkeri alýy tıis degen oıdy quptaımyn. Ózgeler bizdiń jolymyzben júredi dep esepteımin. Otbasyma da vaktsına saldyrýǵa keńes beremin. Qazir ózimdi qaýipsiz sezinemin», - dedi medıtsına mamany Jomart Makarov.
Aıta keteıik, jalpy oblys boıynsha 150 myń adam vaktsına qabyldaıdy. Búgin ekpe jasatqan medıtsına qyzmetkerleri 21 kúnnen soń ekinshi dozany alady.
«Emhanada vaktsına qabyldaǵan alǵashqy bes adamnyń biri ózim boldym. Bul kádimgi ekpe. Esh áserin ázirge sezbedim. Koronavırýs ınfektsııasyn jeńýdiń bir joly vaktsına dep esepteımin. Búgin qabyldadym, 21 kúnnen soń ekinshi vaktsınasyn egemin», - №3 Aqtóbe qalalyq emhanasynyń bólim meńgerýshisi Lázzat Bısenova.
