Aqtóbe oblysynda mal basy artyp, aýyl sharýashylyǵy tehnıkalary jańartylýda
NUR-SULTAN. QazAqparat – Aqtóbe oblysynda mal basy artyp, aýyl sharýashylyǵy tehnıkalary jańartylyp jatyr. Bul týraly Aqtóbe oblysynyń ákimi Ońdasyn Orazalın aıtyp berdi, dep habarlaıdy QazAqparat tilshisi.
«Óńirimizdiń ózindik áleýeti – qolaıly klımat jáne keń baıtaq alqaptardyń bolýy mal sharýashylyǵy men egin sharýashylyǵyn damytýǵa jáne elimizdiń batys óńiriniń azyq-túlik qaýipsizdigin qamtamasyz etýge, ónimderdi shetelderge eksporttaýǵa múmkindik beredi. Biz 2019 jyly Aýyl sharýashylyǵy mınıstrligimen kelisip, Aqtóbe oblysynyń agroónerkásiptik kesheniniń damýy boıynsha 5 jyldyq jospar ázirledik», - dep atap ótti O. Orazalın Ortalyq kommýnıkatsııalar qyzmetinde ótken baspasóz máslıhatynda.
Sol josparǵa sáıkes 2020-2021 jyldary jem-shópti sýbsıdııalaý úshin jergilikti bıýdjetten buryn-sońdy bolmaǵan 12,7 mlrd teńge bólindi jáne aýyl sharýashylyǵy tehnıkasyn jańartýdy sýbsıdııalaýǵa 7,2 mlrd teńge qarajat qarastyrylǵan.
«Tehnıka alýǵa respýblıkalyq bıýdjetten beretin 25%-tik sýbsıdııaǵa qosymsha jergilikti bıýdjetten 10% qosymsha bólip otyrmyz. Nátıjesinde, aýyl sharýashylyǵy tehnıkasynyń jańartylýy qarqyndy júrýde. Máselen, 2019 jyldyń qorytyndysy boıynsha bul kórsetkish 3,9% qurasa, 2021 jyly 5,9%-ke jetkizildi. 2021 jyldyń qorytyndysyna sáıkes atalǵan baǵyt boıynsha oblystar arasynda aldyńǵy qatardamyz, ıaǵnı, tehnıkalardyń jańartylýyna qoldaý kórsetildi», - dedi O. Orazalın.
Sońdaı-aq sońǵy 2 jylda 700 mlrd teńgeden astam aýyl sharýashylyǵy ónimi óndirildi, jylqy maly 38%–ke ósti, iri qara mal basy – 20%-ke, usaq mal – 7,1%-ke, qustar sany – 4,5%-ke ulǵaıdy. Osyndaı qarqynmen mal basynyń artýyna baılanysty jem-shóppen qamtamasyz etý úshin 2020 jyldan beri respýblıkalyq bıýdjet esebinen 25 myń gektar kóltabandy jáne 10,6 myń gektar únemi sýarmaly jerler búginde qalpyna keltirilýde. Jalpy josparǵa sáıkes aldaǵy 3 jylda qoldanystaǵy sýarmaly jerlerdiń alqabyn 100 myń gektarǵa deıin jetkizemiz», - dedi óńir ákimi.
Osy sharalar arqyly oblys 32 negizgi azyq-túliktiń 24-imen ózin-ózi qamtamasyz etedi. Onyń ishinde un, nan ónimderi, sút, et ónimderi, jumyrtqa jáne kókónis túrleri bar.
«Aldaǵy 3 jylda agroónerkásiptik keshende 315 mlrd teńgege 75 jobany iske asyrýdy josparlap otyrmyz. Nátıjesinde keleshekte baǵany turaqtandyrýǵa tolyqtaı múmkindigimiz bolady», - dedi Ońdasyn Orazalın.
