Aqtóbe oblysynda qys mezgiline 542 tehnıka daıyn tur
AQTÓBE. QazAqparat – Aqtóbede qysqa daıyndyq pysyqtaldy. Barlyǵy 500-den astam tehnıka qutqarý, qar arshý jumystaryna jumyldyrylady.
Bul týraly óńirlik kommýnıkatsııalar qyzmetinde qysqa daıyndyq máselesine baılanysty ótken baspasóz máslıhatynda oblystyq Tótenshe jaǵdaılar departamenti bastyǵynyń orynbasary Qaırat Qasym málim etti, dep habarlaıdy QazAqparat tilshisi.
Aqtóbe oblysy boıynsha 900-den astam adam jáne 542 tehnıka daıyndaldy. Sonyń ishinde tótenshe jaǵdaılar departamentiniń qurylymdyq bólimderinde 175 adam men ótimdiligi joǵary 40 tehnıka ázir.
«Barlyǵy 156 jylytý beketi bar. Onda 10 myńnan astam adamǵa kómektesýge múmkindik bar. Sonymen birge 14 myń tonna ınertti materıal, 26 myń tonna janar-jaǵarmaı qory ázirlendi. Komıssııa barlyǵynyń jumysyn qarap shyqty. Kemshilikterdi joıý jumystary da júrgizildi. Ótken jyly 102 avarııalyq qutqarý-izdestirý jumysy júrgizilip, 670 adam aman qaldy. 400-den astam tehnıka qar qursaýynan shyǵyryldy», - dedi Qaırat Qasym.
Aqtóbe oblysy boıynsha ázirge qar qursaýynda qalǵan tehnıka bolmady. Óńirde 38 merdiger qar tazalaý jumysyn júrgizedi. Olarda 100-den astam tehnıka bar.
«Qar ustaý úshin jaz-kúz aılarynda jol boıyna aǵash egildi. Qysqa qajetti ınertti materıal bar. Joldar ashyq, ári qaraı da bári baqylaýda bolady»,- dedi oblystyq jolaýshylar kóligi jáne avtomobıl joldary basqarmasynyń basshysy Málimbet Ibrashev.
