Aqtóbe oblysynda kúnbaǵys, júgeri ósiretinder kóbeıgen
Aqtóbeniń Mártók aýdany aýyl sharýashylyǵyna qolaıly ólke. Munda sharýalar dándi daqyldar egip, mol ónim alyp júr. Alaıda sońǵy jyldary dástúrli emes sharýashylyqtyń úlesi artty. «Ekoprodýkty Martýka» jeke kásipkerligi 4 gektarǵa júregi, 2 gektarǵa qulpynaı otyrǵyzdy. Ónim mol. Barlyǵy 7 tonna qulpynaı jınady.
«Jalpy sharýashylyq 2017 jyly qurylyp, qulpynaı ósirýdi qolǵa aldyq. Alǵashynda aýmaǵy 1 ga boldy. Qazir 2 gektarǵa jetti. Sonymen birge júgeri egip otyrmyz. Óte tátti. Ónim oblys bazarlaryna shyǵaryldy, suranys joǵary», - dedi sharýashylyq basshysy Rahat Kópjan. Jaqynda sońǵy tehnologııalyq ádispen 1 ga aýmaqqa qulpynaı egý jumystaryn júrgizýdi bastaıdy. Reseıden «Malga», «Bıýtı» jáne «Klerı» sekildi gollandııalyq suryptyń elıtalyq kóshetin satyp alýdy josparlady. Egistik alqabynyń jalpy kólemi 27 ga quraıdy. Taǵamdyq júgerini Aqtóbe qalasynan ózge Qostanaı, Atyraý, Aqtaý qalalaryna jiberedi. Memlekettik sýbsıdııanyń arqasynda quny 6 mln teńge bolatyn traktor satyp alǵan.
Aýdandaǵy «RodnıkıAgro» JShS-i bıyl 25 576 ga jer alqabyna aýyl sharýashylyǵy daqyldaryn ekken. 635 ga kúzdik bıdaı, 13 947 ga bıdaı, 195 ga tary, 5 142 ga kúnbaǵys, 5 396 ga maqsary, 456 ga birjyldyq shóp bar. Búgingi kúni 635 ga kúzdik bıdaıdyń túsimi gektaryna 12 tsentnerge jetti. Munda saǵatyna 24 tonna daqyldy keptiretin baza jumys isteıdi.
«Munda kúnbaǵys 5 myń ga egilgen. Eger sýbsıdııa bolsa kólemin ulǵaıtyp, osy baǵyttaǵy isimizdi jandandyrǵymyz keledi. Kúnbaǵys Aqtóbe jerine jaqsy ósedi», - dedi agronom Maratbek Almuratov.
Oblys ákimi Ońdasyn Orazalın Mártók aýdanyndaǵy birqatar aýylsharýashylyq nysandaryn aralady. Aldymen Hazret aýyldyq okrýgindegi dándi-daqyl ósirýmen aınalysatyn «Kokvest» JShS- de boldy. Egin jınaý jumystarymen tanysty.
«Bıyl 4138 ga bıdaı, 911 ga arpa, 320 ga suly,100 ga júgeri ekken. Bıyl aýa raıynyń qolaıly bolýyna baılanysty egin bitik shyqty. Kúzdik egindi jınaý tamyz aıynda bastaldy. Mártók aýdany aýylsharýashylyq bóliminiń basshysy Shamıl Sarınniń aıtýynsha, aýdanda 126 myń ga egistik alqap bar. Onyń 62 myń ga dándi-daqyldar egilgen. Birneshe sharýa óojalyǵy óz jumysyn kórsetti. Aımaq basshysy Mártók aýylyndaǵy avtomobıl joldarynyń ortasha jóndeý jumystary men aýdandyq ortalyq aýrýhananyń kúrdeli jóndeý jumystaryn baqylady. Jobalar «Jumyspen qamtý jol kartasy» memlekettik baǵdarlamasy aıasynda júzege asyryldy. Jergilikti 42 azamat jumyspen qamtyldy», - dep habarlady oblys ákiminiń baspasóz qyzmeti.
