Aqtóbe oblysynda kólik aýdarylyp, bir top qyrǵyzstandyq zardap shekti
AQTÓBE. QazAqparat – Samara-Shymkent tasjolynda jeńil kólik aýdarylyp, jeti adam aýrýhanaǵa tústi. Bir jolaýshy kóz jumdy, dep habarlaıdy QazAqparat tilshisi.
Oqıǵa saǵat 07:30-da boldy. Samara-Shymkent tasjolynyń 1053 shaqyrymynda, ıaǵnı, Yrǵyz aýdanynyń Qalybaı aýyly mańynda «Toıota Alfard» kóliginiń júrgizýshisi rólge ıe bola almaı qalǵan. Saldarynan kólik aýdarylyp, oqıǵa ornynda bir jolaýshy kóz jumdy. Taǵy alty jolaýshy men júrgizýshi Yrǵyz aýdandyq aýrýhanasyna jetkizildi. Bári Qyrǵyzstan azamaty.
«Qazir jol-kólik apaty kezinde zardap shekken azamattar aýrýhanaǵa jetkizildi. Tergeý bastaldy. Oblystyq polıtsııa departamenti shetel azamattaryna jol erejesin saqtaýdy eskertedi. Sebebi iri halyqaralyq tasjolda jıi jol apaty tirkeldi. Máselen, 26 tamyzta Samara-Shymkent tasjolynda «Lada-21703» kóligi júk mashınasymen soqtyǵysyp qaldy. Nátıjesinde jeńil kóliktiń 22 jastaǵy júrgizýshisi aýrýhanada kóz jumdy», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, Qyrǵyzstan kóligi aýdarylyp qalǵan Qalybaı aýyly mańynda ótken jyly 52 Ózbekstan azamaty janyp ketken bolatyn.
