Aqtóbe oblysynda kóbelek qaptap ketti
AQTÓBE. QazAqparat - Aqtóbe oblysy aýmaǵynda shalǵyn kóbelek qaptap ketti. Turǵyndar túnde jaryqqa úımelep, kúndiz úıge kirip jatqanyn aıtyp, kómek surady, dep habarlaıdy QazAqparat tilshisi.
Shilde aıynda Aqtóbede sharýalar men bosalqy jerdi, aýyl ishin qurt jaılasa, qazir ósip kóbelekke aınaldy.
«Qazaqstan aımaǵynda shalǵyn kóbelektiń kóbeıýi eki urpaqqa, elimizdiń batys óńirinde, onyń ishinde Aqtóbede úsh urpaqqa deıin jalǵasýy múmkin. Jalpy bul zııankestiń jappaı taralýy 8-10 jylda baıqalyp tur. Shalǵyn kóbelektiń adamdar men ósimdikke esh zııany joq. Tek juldyzqurty zııandy. Respýblıkalyq fıtosanıtarııalyq dıagnostıka jáne boljamdar ádistemelik ortalyǵynyń málimeti boıynsha, 7 tamyzdan bastap Aqtóbe qalasy, Muǵaljar Qobda, Alǵa, Mártók, Qarǵaly, Hromtaý aýdandarynda shalǵyn kóbelektiń jappaı ushýy baıqalyp otyr. Endi tamyz aıynyń aıaǵy nemese qyrkúıekte qaıta juldyzqurt shyǵýy múmkin. Sondyqtan jeke kásipkerler, adamdardyń ózderi monıtorıng jasap, qurt kezinde ýlaýy kerek», - dedi Aqtóbe oblystyq aýyl sharýashylyǵy basqarmasy basshysynyń orynbasary Asylhan Ábtıev.
Aqtóbede oblysy boıynsha 38 myń gektar jerdi sharýalar, al 1800 gektar jer demeýshiler qarjysymen óńdeldi.
«Shalǵyn kóbelektiń qurty ǵana qaýipti. Qazir kóbelek 3-7 kún boıy ushady. Keıin jumyrtqa salady. Jumyrtqanyń damý kezeńi 3-10 kún aralyǵynda. Keıin ǵana juldyz qurty shyǵady. Juldyzqurttyń damýy 1-4 apta aralyǵynda. Bul da aýa raıyna baılanysty. Ylǵaldy, jańbyrly bolsa damıdy, al ystyqta óledi», - dedi «Respýblıkalyq fıtosanıtarııalyq dıagnostıka jáne boljamlar ádistemelik ortalyǵy» RMM basshysy Ǵarıfýlla Jolaev.
