Aqtóbe oblysynda qaýipsizdik salasynyń joǵary tehnologııalyq tehnıkalary shyǵarylmaq
BEIJІŃ. QazAqparat - Aqtóbe oblysynyń ákimi Berdibek Saparbaev Qytaıǵa jumys sapary aıasynda «Nuctech» kompanııasynyń vıtse-prezıdenti Van Veıdýnmen kelissózder júrgizdi, dep habarlaıdy QazAqparattyń Beıjińdegi menshikti tilshisi.
Eki tarap Aqtóbe oblysynda birlese qaýipsizdik salasynyń joǵary tehnologııalyq tehnıkalaryn: rentgentelevızııalyq apparat, jarylǵysh zattardy anyqtaıtyn qurylǵy, radıoaktıvti zattardy anyqtaıtyn júıe, jolaýshylardy tekseretin qurylǵylardy shyǵarý máselesin talqylady.
«Qazirgi tańda Qazaqstan óńirdegi eń bir ashyq memleket retinde tanylyp otyr - munda sheteldik ınvestorlarǵa jaqsy saıası ári ınstıtýtsıonaldyq qoldaý kórsetiledi. Sol sebepti biz bul joba sátti bolyp, basqa da naryqtarǵa, máselen Reseı men Qyrǵyzstan naryǵyna, taýar shyǵarýǵa múmkindik beredi dep senemiz», - dedi kezdesý barysynda Van Veıdýn.
Óz kezeginde Berdibek Saparbaev «Nuctech» kompanııasymen ózara árekettestiktiń birneshe naqty nusqalaryn usyndy, olardy aldaǵy ýaqytta qos tarap qarap kóredi.
Eske sala keteıik, «Nuctech» - Qytaıdyń kedendik jáne basqa da vedomstvolaryna, sondaı-aq álemniń 122 memleketine qaýipsizdik tehnıkalaryn jetkizýshi kompanııa. Polshada óndiristik tsehy jumys isteıdi.
Qazaqstan «Nuctech» kompanııasymen 2004 jyldan beri jumys isteıdi. Qazirge deıin kompanııa QR terrıtorııasy aýmaǵynda 26 iri kólemdi ınspektsııalyq-tekserýshi keshenin, 340 shaǵyn kólemdi tekserý júıesin ornatty. Olar Qaıraq, Qazyǵurt, Baqty, Atameken, Temir Baba kedendik beketterinde, Qulan, Beıneý, Altynkól, Dostyq, «Qorǵas» shekara mańy yntymaqtastyq halyqaralyq ortalyǵy stantsııalarynda, Almaty men Shymkent áýejaılarynda, 16 temir jol vokzalynda, EKSPO-2017 nysandarynda, Beıbitshilik saraıynda jáne basqa da nysandarda jumys istep tur.
