Aqtóbe oblysynda karantın talaptaryn buzǵandarǵa 126 mıllıon teńge aıyppul salynǵan
AQTÓBE. QazAqparat – Aqtóbede koronavırýs ınfektsııasyna shaldyqqan 53 adam aýrýhanada jatyr. Olardyń arasynda jasandy tynys alý apparatyna qosylǵan naýqas joq, dep habarlaıdy QazAqparat tilshisi.
Ótken táýlikte óńirde 7 adamnan koronavırýs ınfektsııasy anyqtaldy. Ekeýi Aqtóbe qalasynyń, úsheýi Shalqar aýdanynyń turǵyny. Sonymen birge Hromtaý jáne Mártók aýdandarynyń turǵyndary da indetke shaldyqty. Aýrýshańdyqtyń ósý deńgeıi 0,2% qurady. Oblysta barlyǵy 3412 jaǵdaı tirkelse, 96 paıyzy jazyldy.
«Aqtóbede epıdemıologııalyq jaǵdaı turaqty. Oblys aýmaǵynda blokpos joq. Aqpan aıynan beri sanıtarlyq-karantındik beket jumys istep tur. 6-qazannan beri «Álimbet» karantındik-sanıtarlyq beketi arqyly 6150, «Jaısań» arqyly 16 myńnan astam adam ótti. Kelgen adamdardyń 21-nen koronavırýs ınfektsııasy anyqtaldy», - dedi Aqtóbe oblysynyń bas memlekettik sanıtarııalyq dárigeri Nursulý Berkimbaeva.
Qazir 354 adam úı karantıninde. Dárigerler óz baqylaýyna aldy.
«Oblys boıynsha qazir 53 adam aýrýhanada em qabyldap jatyr. Onyń 31-i qalada, 22-i aýdandarda. Jansaqtaý bóliminde 2 naýqas bar. Al jasandy tynys alý apparatyna qosylǵan eshkim joq», - dedi oblystyq densaýlyq saqtaý basqarmasynyń basshysy Rústem Isaev.
Mobıldi toptar jumysyn jalǵastyryp jatyr. Olar jınaqtaǵan qujat negizinde 1024 ákimshilik hattama toltyrylyp, 126 mıllıon teńge aıyppul salyndy.
«Karantın shekteýlerin saqtap, 65 jastan asqan adamdardyń sebepsiz dalaǵa shyqpaýyn suraımyz. Adam kóp jınalatyn oryndarǵa barmaǵany durys. Betperde taǵý, araqashyqtyqty saqtaý, antıseptık qoldaný týraly eskertýdi jıi aıtamyz», - dedi Nursulý Berkimbaeva.
