Aqtóbe oblysynda karantın kúsheıtile me: Bas sanıtarlyq dárigerdiń jaýaby
Sońǵy táýlikte Aqtóbe oblysynda 1 adamnan koronavırýs ınfektsııasy anyqtaldy. 31 jastaǵy Aqtóbe turǵyny profılaktıkalyq maqsatta tekserilgen. PTR-synamasy onyń vırýs juqtyrǵanyn kórsetken. Búginge deıin óńirde barlyǵy 3 myńnan astam adam vırýs juqtyrsa, olardyń 98 paıyzy jazylyp shyqty.
«Shekaralarda shekteý sharasy kúsheıtildi. Aqtóbe oblysynda eki shekara beketi bar. Qarǵaly men Mártók arqyly 6-14 qazan aralyǵynda 3600-den astam adam ótti. Onyń ishinde anyqtama qujaty bolmaǵan 594 adamnan PTR-synama alynyp, ekeýiniń nátıjesi oń bolyp shyqty. Olar oqshaýlanyp, em alýda. Kórsetkish keıbir oblysta asyp ketip jatyr. Shekteý de kúsheıtilgen. Aqtóbe oblysynda epıdemıologııalyq jaǵdaı turaqty. Eger buǵan deıingi qaýlyda bekitilgen talapty saqtap, sanıtarlyq erejeni ustanatyn bolsaq, jańa qaýly qabyldanbaıdy. Kórsetkishti saqtap qalý ózimizdiń qolymyzda. Betperde taǵyp, áleýmettik araqashyqtyqty saqtaý qajet», - dedi Nursulý Berkimbaeva.
Aıta keteıik, oblysta karantın talaptarynyń saqtalýyn tekseretin monıtorıngilik toptar jumys isteıdi. Barlyǵy 1 myńǵa jýyq hattama toltyrylyp, 82 mıllıon teńgeden astam aıyppul salyndy.
Eske salsaq, óńirde qajettilik týyndaǵan jaǵdaıda tósek-oryn sany 315-ten 3603-ke deıin ulǵaıtylmaq. 6 qazannan bastap A.Dosjanova jataqhanasy, Jaısań kópsalaly kolledji, Qarǵaly aýdanynyń Álimbet mektep-ınternatynan 440 oryndyq 3 statsıonar iske qosyldy. Oblystaǵy 1547 tósek-orynnyń 1438-i, ıaǵnı, 93% ottegimen qamtylǵan.
Foto: mugalzhar.kz