Aqtóbe oblysynda qansha bala men júkti áıelge vaktsına salynýǵa tıis

AQTÓBE. QazAqparat – Aqtóbede 46 myń bala men 4 myń júkti áıel vaktsınatsııalaýǵa jatady. Bul týraly óńirlik kommýnıkatsııalyq qyzmetinde ótken baspasóz máslıhatynda aıtyldy, dep habarlaıdy QazAqparat tilshisi.

Aqtóbe oblysyna barlyǵy 767 myń doza vaktsına jetkizildi.

Onyń 507 myń dozasy - Spýtnık V, 41 myńy - QazVac, 56 myńy - Hayat-Vax, 22 myńy - CoronaVac, 141 myńy - Sinofarm vaktsınasy.

Oblys turǵyndarynyń 327 myńnan astamy birinshi, 300 myńǵa jýyǵy eki komponentin de qabyldady.

«Pfize vaktsınasy qarasha aıynyń sońyna jetkizilýi múmkin. Barlyǵy 46 myńǵa jýyq bala, 4 myń júkti áıel vaktsınatsııalaýǵa jatady», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.

Aıtyp óteıik, qazirgi kezde 71 bala koronavırýs ınfektsııasyn juqtyrǵan bolsa, onyń tórteýi aýrýhanada em qabyldap jatyr.

Sonymen birge 12 júkti áıel dárigerler baqylaýyna alynǵan.

«Úsh júkti kelinshek te qazir jansaqtaý bóliminde. Jaǵdaıy turaqty aýyr. Em qabyldaýyn jalǵastyryp jatyr», - dedi Bekbolat Іzbasarov.

Qazir Aqtóbe oblysy boıynsha ınfektsııalyq kereýet júktemesi - 42,3%, al jansaqtaý bólimindegi júkteme 37,7% qurap otyr.