Aqtóbe oblysynda ishki naryqty qus etimen 100% qamtý josparlanǵan

ASTANA. QazAqparat - Aqtóbe oblysy jyl saıyn qus etiniń 90%-dan astamyn shetelden jáne elimizdiń basqa óńirlerinen satyp alyp otyr. Іshki óndiris kórsetkishi bar bolǵany – 5,4%. Atalǵan másele «Aýyl amanaty» aýqymdy jobasy arqyly sheshiledi degen jospar bar, dep habarlaıdy óńirlik ákimdiktiń baspasóz qyzmeti.

Óńirde ımportty tómendetý, azyq-túlik taýarlarynyń baǵasyn turaqtandyrý maqsatynda birqatar túbegeıli sharalar qabyldanýda. Atap aıtqanda, ishki naryqty qus etimen qamtý kezeń-kezeńimen 100%-ǵa deıin jetkiziledi.

Bul týraly Aqtóbede «AMANAT» partııasynyń tóraǵasy Erlan Qoshanovtyń qatysýymen ótken aýyl halqynyń tabysyn arttyrýǵa baǵyttalǵan «Aýyl amanaty» jobasyn iske asyrý máselelerine arnalǵan jıynda belgili boldy.

24 aýyldyq okrýgte bastalǵan joba aıasynda quny 3 mlrd teńgeni quraıtyn 2 772 jobany iske asyrý josparlanǵan. Olardyń 2182-si – qus sharýashylyǵyn damytýdy kózdeıdi. Qus ósirýmen aınalysatyn aýyl turǵyndary jeńildetilgen qaryz alyp qana qoımaı, sharýasyn dóńgeletýdiń barlyq qyr-syryn úırenedi.

Aldyn ala boljamdarǵa súıensek, 2023 jyly qus etiniń kólemi óńirdiń ishki naryq qajettiliginiń 31%-yn, 2024 jyly 64%-yn jabady, al 2025 jyly kórsetkish 100%-ǵa deıin ulǵaıady. Osylaısha oblys ımportty tolyǵymen jergilikti taýarlarǵa almastyrady.

«Biz ımportty qysqartý jáne ishki naryqty óz óndirisiniń taýarlarymen toltyrý, azyq-túlik qaýipsizdigin qamtamasyz etý úshin «Aýyl amanaty» jobasyn paıdalanatyn bolamyz. Eń bastysy bul joba baǵany turaqtandyrýǵa múmkindik beredi. Jobaǵa qatysýshylardy ósimdik, mal, qus, balyq, dástúrli emes sharýashylyqtar jáne aýyl sharýashylyǵy ónimderin qaıta óńdeý boıynsha mamandar oqytady», - dep atap ótti Aqtóbe oblysynyń ákimi Eraly Toǵjanov.