Aqtóbe oblysynda halyq sany 900 myńnan asty

AQTÓBE. QazAqparat – Jyl basynan beri óńir halqynyń sany 8,3 myńǵa artyp, búginde 900 myńnan asyp otyr. Óńirde tabıǵı ósim baıqalady, dep habarlaıdy QazAqparat tilshisi.

Aqtóbe oblystyq statıstıka departamentiniń málimetine súıensek, 900 myńnan astam adamnyń 72% jýyǵy qalada turady.

2021 jyldyń qańtar-tamyz aılarynda oblys boıynsha jalpy halyq sany 8,3 myń adamǵa nemese 0,92% ósken.

«2021 jyldyń qańtar-tamyz aılary aralyǵynda oblys halqynyń tabıǵı ósimi 9,2 myń adamdy qurady. Osy aralyqta 15 myńnan astam bala ómirge keldi. 2020 jyldyń qańtar-shilde aılarymen salystyrǵanda tabıǵı ósim 28,5 %, bala týý kórsetkishi 13,9 % ósti, ólim-jitim 10,5% azaıdy. 4 myńnan astam adam neke qıyldy. Ajyrasý sany 20,5% kemidi», - dep habarlady Aqtóbe oblystyq statıstıka departamentiniń baspasóz qyzmeti.

Jalpy oblys ishindegi kóshi-qon máselesine toqtalsaq, 20 myńǵa jýyq adam kóship kelse, 21 myńnan astamy kóship ketken.

Jalpy óńirge ózge elden 300 adam kelse, 1491-i ózge jaqqa qonys aýdardy. Shetelden 100-den astam qazaq kóship kelse, taǵy 75-i shekara asqan.

«Óńiraralyq kóshi-qonda esepti kezeńde kelgender sany 2020 jylǵy qańtar-tamyzben salystyrǵanda 2,9% ósti (2021 jyly – 4174 adam, 2020 jyly – 4058 adam), ketkender sany 13,1 % ósti (2021 jyly – 4786 adam, 2020 jyly – 4231adam), kóshi-qon saldosy - 612 adamdy qurady (2020 jyly -173 adam).

2021 jylǵy qańtar-tamyzda oblys sheginde turǵylyqty jerin ózgertkender sany 15436 adamdy qurady.

2020 jylǵy qańtar-tamyzda 14771 adam, nemese 4,5% kóp», - dedi Aqtóbe oblystyq statıstıka departamentiniń baspasóz qyzmeti