Aqtóbe oblysynda gaz baǵasynyń negizsiz qymbattaýyna jol bermeýge qatysty memorandýmǵa qol qoıyldy

AQTÓBE. QazAqparat - Aqtóbe oblysynda suıyltylǵan gazǵa baǵanyń negizsiz joǵarylaýyna jol bermeý jóninde memorandýmǵa qol qoıyldy. Oblys basshylyǵynyń bastamasymen atalǵan qujatqa jergilikti bılik organy, gaz jelilik uıymdarynyń ókilderi men gazdy bólshektep satý naryǵynyń sýbektileri arasynda qol qoıylyp otyr.

Oblystyq ákimdiktiń baspasóz qyzmetiniń habarlaýynsha, qujatqa sáıkes, taraptar kóterme saýdadaǵy baǵanyń negizsiz joǵarylaýyna jol bermý, tutynýshylardy suıyltylǵan gazdy erkin satý arqyly qamtamasyz etý, sonymen qatar, baǵany turaqtandyrýǵa jáne gaz jetkizýde olqylyqtar bolmaýy úshin birlesip sharalar qolǵa alady.

Sonymen birge taraptar gaz motorly otyn baǵasyn lıtrine 37 teńge deńgeıinde ustap turý jóninde kelisimge qol jetkizdi.

Esterińizge sala keteıik, Qazaqstanda suıyltylǵan munaı gazyna jańa shekti baǵa qoıylǵan bolatyn.

«QR Energetıka mınıstrliginiń 2016 jyldyń 5 shildesindegi №301 buıryǵyna sáıkes, 2016 jyldyń 30 qyrkúıegine deıin ishki naryqta suıylylǵan munaı gazyn satqanda 23106,45 teńge/tonna (QQS eseptemegende) deńgeıinde bolý kerek», delingen Energetıka mınıstrliginiń habarlamasynda.

QR «Gaz jáne gazben qamtamasyz etý týraly» Zańyna sáıkes, suıyltylǵan gazdy ishki naryqtaǵy taratýdaǵy shekti baǵa elimizdiń barlyq aýmaǵynda qoldanylady. 2015 jyldyń aqpan aıynan beri QR-da shekti kóterme baǵa tonnasyna 11 033,91 teńge deńgeıinde bolatyn (QQS eseptemegende). Bul kórshiles memleketterdegi baǵalarǵa (Reseıde - 59 019 teńge/tonna, Tájikstan - 104 864 teńge/tonna) qaraǵanda áldeqaıda tómen.