Aqtóbe oblysynda Eset batyrdyń 355 jyldyǵy atalyp ótýde
Negizgi merekelik sharalar Eset batyr kesenesi men qorymy ornalasqan Alǵa aýdany Bestamaq aýylynyń mańynda ótti. Elimizdiń túkpir-túkpirinen kelgen shara qonaqtary kıiz úılerden dám tatyp, at jarysy men Eset batyrdyń erligin baıandaıtyn teatrlandyrylǵan kórinisterdi tamashalady.
Qazaq tarıhynda aty ańyzǵa aınalǵan tulǵanyń rýhyna taǵzym etýge kelgenderdiń qatarynda belgili mádenıet qaıratkerleri Asanáli Áshimov, Іlııa Jaqanov, Altynbek Qorazbaev, Nesipbek Aıtuly, Júrsin Erman, Qasymhan Begmanov, Ómirzaq Ozǵanbaev, Aqushtap Baqtygereeva, Baýyrjan Jaqyp jáne taǵy basqalary bar.
Halyq ártisi Asanáli Áshimov mundaı sharalardyń óskeleń urpaqtyń patrıottyq sezimin oıatyp, ulttyq tárbıe berý úshin mańyzy zor ekenin atap ótti.
«Qazaq bolyp týǵanyma qýanamyn, ásirese, onyń ónerin qýǵanyma qýanamyn. Sahnadan, ekrannan jaqsy keıipkerler jasap, ómirge qaıta týa alamyn. Qazaqtyń keń, baıtaq jerine qýanamyn. Men árqashan halyqpen birgemin. Eset batyr barsha halyqqa, ásirese, jastarǵa óziniń erlik isterimen úlgi», – dedi A.Áshimov.
Aqtóbe oblysynyń ákimi Eraly Toǵjanov elimizdiń táýelsizdigi men azattyǵy úshin kúresken batyrlardyń erligin eske alý urpaq paryzy ekenin aıtty.
«Tarıhy tereń qart Aqtóbeniń kıeli topyraǵynda kindigi kesilip, jaýda batyrlyq, daýda sheshendik tanytyp, halqynyń bostandyǵy men ultynyń tutastyǵyn, jeriniń bútindigin saqtaý jolynda janqııarlyq erlik kórsetip, tulǵalyq deńgeıge kóterilgen uldary az emes. Osyndaı – el basyna kún týǵanda halqymyzdyń baǵyna bitken, batyl da baıypty mámileger, saıasatker, eldiń birligine uıytqy bola bilgen, qol bastaǵan batyrymyz – Eset Kókiuly. Eset batyr búkil ómirin halqynyń azattyǵyna arnaǵan, erlik joly ult tarıhyna altyn árippen jazylǵan tulǵa» – dedi E.Toǵjanov.
Merekege oraı ulttyq at sporty túrlerinen jarystar uıymdastyryldy. Báıgege 50-ge jýyq shabandoz qatysty. Alaman báıgedegi bas júldege tigilgen avtokólikti Qobda aýdanynyń turǵyny alsa, ekinshi orynǵa tigilgen 1 mıllıon teńge júldeni Astana qalasynan kelgen shabandoz jeńip aldy.
Aıta keterligi, Eset batyrdyń 355 jyldyǵyna oraı taǵy birqatar sharalar ótkizilmek. Keshe «Erkindik qyrany, sharyqta» atty eki kúnge sozylatyn respýblıkalyq aqyndar aıtysy ótken edi. Baıqaýǵa Asanáli Áshimov bastaǵan qazylar alqasy tórelik etti.
