Aqtóbe oblysynda erli-zaıypty joǵalyp ketken
AQTÓBE. QazAqparat - Aqtóbe oblysynyń Oıyl aýdany, Jarly aýylynan Qańbaqsaı aýylyna shyqqan erli-zaıypty Esetovter jolda adasyp ketken. Olardy polıtsııa men aýyl ákimi izdep, joldan tapty, dep habarlaıdy QazAqparat tilshisi.
62 jastaǵy Birjan men 55 jastaǵy Venera Esetovter mejeli jerge jete almaı qalǵan. Uıaly telefondary da baılanys aıasynan tys jerde bolyp, týǵan-týystary alańdaǵan. Olardy izdep-tabýǵa Baıǵanın, Temir jáne Oıyl aýdandarynyń polıtseıleri jumyldyryldy.
«Temir aýdany, Tasqopa aýyldyq okrýginiń ýchaskelik ınspektory Jandos Aıseev olardyń Qoı aýylynan ótkennen keıin joǵalǵanyn anyqtady. Osydan keıin polıtseı aýyl ákimi Márzııa Qojaqovamen birge erli-zaıyptyny izdeýge shyqqan. Jarty saǵattan keıin qar qursaýynda qalǵan Nıva kóligi tabylyp, tońyp qalǵan Esetovter otbasy Tasqopa aýylynyń ákimdigine jetkizildi», - dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.
