Aqtóbe oblysynda elektr stantsııasy salynbaq
ASTANA. QazAqparat - Aqtóbede «Rýhanı jańǵyrý» baǵdarlamasy aıasynda «Týǵan jer» respýblıkalyq forýmy ótip jatyr. Álemniń 21 elinen 300-ge jýyq jerlesterdi jınaǵan sharanyń resmı ashylýynda jalpy somasy 80 mlrd teńgeni quraıtyn birqatar memorandýmǵa qol qoıyldy, dep habarlaıdy óńirlik ákimdiktiń baspasóz qyzmeti.
Búgingi tańda Ulybrıtanııa, Germanııa, Reseıde jáne ózge elderde turatyn, sheteldik bıznes qurylymdarynyń Aqtóbe óńirinen shyqqan basshylary men oblys ákimdigi arasyndaǵy kelisimder negizinde óńirde birqatar erekshe óndirister turǵyzylatyn boldy.
Atap aıtqanda, «Aqtóbe-TermoKoks» JShS men 700 MVt elektr stantsııasyn salý jáne qońyr kómir kenin ıgerý jónindegi iri jobany júzege asyrý týraly kelisimge qol jetkizildi. Іri jobany júzege asyrý arqyly aımaqtaǵy elektr energııasynyń tapshylyǵyn toltyrýǵa jáne sonymen qatar 400-den astam jumys ornyn ashýǵa múmkindik týady.
Sondaı-aq, 26 mlrd. teńge kóleminde ınvestıtsııa tartý arqyly jel generatorlaryn, qalaq jasaıtyn, metall munaralardy jınaqtaıtyn zaýyt qurylysyn bastaý arqyly 500 jumys ornyn ashý josparda bar. Bul joba «EKSPO-2017» halyqaralyq kórmesimen baılanysty jáne jańartylatyn energııa kózderin damytý boıynsha jumysty kúsheıtýge múmkindik beredi.
Reseılik kásiporyndarmen de birqatar memorandýmdarǵa qol qoıyldy. Aıtalyq, «STIM» jáne «Ádemi» JShS toqyma buıymdarynyń óndirisin qalpyna keltirýge nıetti. Reseı Federatsııasynyń eń iri toqyma kásiporyndary quryltaıshylarynyń biri ıÝrıı Baklanov Aqtóbe qalasynda dúnıege kelgen. Kásipkerdiń bastamasy boıynsha, «Ádemi» JShS bazasynda toqyma buıymdarynyń bos turǵan óndirisin qalpyna keltirý josparlanyp otyr. Buryn onyń anasy osy tsehtyń basshysy bolyp qyzmet istegen eken.
«Aqtóbe jerlestigi» ÓQU atqarýshy dırektory Sergeı Vorobev oblys ákimdiginiń qoldaýymen Baıǵanın jáne Qarǵaly aýdandarynda ken oryndaryn ıgere otyryp, konteınerlik tıptegi tsement zaýytyn salǵysy keledi. Tsement óndirisi shıkizatqa ımporttyq táýeldilikti boldyrmaıdy jáne «Nurly Jer» memlekettik baǵdarlamasy aıasyndaǵy oblystyń qurylys ındýstrııasynyń damýyna serpin beredi dep kútilýde.
«Energyprom» JShS ınnovatsııalyq zertteýlerdi, atap aıtqanda óńirdegi ónerkásiptik kásiporyndardyń barlyq salalarynda paıdalanýǵa arnalǵan óndiristik elektr qozǵaltqyshtaryn engizýdi josparlaýda.
Sondaı-aq, Aqtóbe oblysynan shyqqan isker azamattar jol boıynda qyzmet kórsetý men basqa da áleýmettik salalardy damytýǵa barynsha úles qospaq.
