Aqtóbe oblysynda eki adam sýǵa batyp ketti
AQTÓBE. QazAqparat – Aqtóbe oblysynda eki adam sýǵa batyp ketti. Onyń biri balyq aýlaýǵa shyqqan, dep habarlaıdy QazAqparat tilshisi.
Tótenshe jaǵdaılar departamentinen málim etkendeı, Aqtóbe qalasynda Sazdy ózenine 62 jastaǵy er adam batyp ketti. Ol otbasymen birge demalysqa shyqqan. Sýdan qutqarýshylar denesin 2 metr tereńdikten kóterip aldy.
«Taǵy bir oqıǵa Qarǵaly aýdanynda boldy. 70 jastaǵy er adam balyq aýlap júrip, jaǵdaıy nasharlap, qulaǵan. Ony kýágerler alyp shyqqan. Qazir mán-jaı anyqtalyp jatyr», - dedi oblystyq TJD baspasóz qyzmetinen.
Aıta keteıik, Aqtóbe oblysynda jyl basynan 25 adam sýǵa batyp ketti, onyń tórteýi – bala.
