Aqtóbe oblysynda dúkenderdi tonap kelgen 20 jasqa tolmaǵan jastar quryqtaldy
ASTANA. 14 naýryz. QazAqparat - Aqtóbe oblysynda dúkenderde urlyqpen aınalysqan 20 jasqa tolmaǵan jastardan quralǵan qylmystyq top quryqtaldy.
Bul týraly búgin jýrnalıstermen bolǵan brıfıngte Іshki ister mınıstrliginiń resmı ókili Nurdildá Oraz málim etti.
Aqtóbe oblysynyń polıtseıleri jedel-izdestirý jáne arnaıy is-sharalar ótkizý barysynda páter urlyǵymen jáne dúkenderden zat urlaýmen aınalysyp júrgen 16 jáne 19 jas aralyǵyndaǵy úsh adamnan turatyn qylmystyq topty qolǵa túsirdi.
«Jedel tásil boıynsha top músheleriniń ótken jyldyń qazan aıynan ústimizdegi jylǵy naýryzyna deıin oblys ortalyǵy jáne mańyndaǵy aýdandarda jasalǵan 26 urlyqqa qatysy bar ekeni dáleldenip otyr. Qaskúnemder dúkender men páterlerge plastıkalyq terezelerdi maıystyryp, syndyrý arqyly kirip júrgen», -dedi resmı ókil.
2011 jyldyń qazan aıynyń ortasynda azyq-túlik dúkenine kirip, tólem termınalyn buzyp, 60 myń teńge men azyq-túlikti jymqyrǵan. Qańtar aıynda Zarechnyı kentindegi bir páterdiń plastıkalyq terezesin maıystyryp syndyryp, úıge kirgen jáne altyn buıymdardy urlap, úıdiń ıesine 835 myń teńgege shyǵyn keltirgen. Urlanǵan altyndardy bazarda satqan.
Ustalǵandardyń ekeýi qamaýǵa alyndy, al úshinshisinen eshqaıda ketpeý týraly qolhat alyndy.
