Aqtóbe oblysynda buǵy múıizimen emdeıtin shıpajaı ashyldy
ASTANA. QazAqparat - Aqtóbe oblysynyń Mártók aýdanynda «Zárý» pantomen emdeý shıpajaıy ashyldy. Saltanatty shara barysynda oblys ákimi Berdibek Saparbaev jobanyń jergilikti turǵyndardy saýyqtyrýǵa jáne oblys týrızminiń damýyna oń áserin tıgizetinine senim bildirdi.
«Men osynda tek aqtóbelikter ǵana emes, sondaı-aq Qazaqstan men Reseıdiń kórshiles óńirleriniń turǵyndary da keledi dep oılaımyn. Qazirgi zamanǵy pantomen emdeý shıpajaıynyń ashylýy - dástúrli emes aýyl sharýashylyǵy men tabysty aımaqaralyq yntymaqtastyqty belsendi damytýdyń aıǵaǵy. Biz agrarlyq sektorda oblys úshin tańsyq óndiristiń túrlerin qoldaý arqyly ekonomıkanyń buryn ıgerilmegen áleýetin paıdalanyp, eń bastysy - azamattarymyzdy óz óndirisimizdiń paıdaly ónimderimen qamtamasyz etemiz», - dep atap ótti Berdibek Saparbaev.
Sonymen qatar, aımaq basshysy jergilikti bılik dástúrli emes aýyl sharýashylyǵymen aınalysatyn AÓK sýbektileri úshin tolyq qoldaý kórsetedi dep sendirdi.
Aıta keteıik, memlekettik qoldaý sharalarynyń birazy buǵy múıizimen emdeıtin emhana-shıpajaıdyń eki qabatty ǵımaratynyń qurylysy men onyń janynda jumys jasap jatqan maral ósirý fermasyna da qoldanyldy. Jergilikti organdar Qazan aýylyna jaqyn mańdaǵy fermaǵa 700 gektar jáne shıpajaıǵa taǵy 1 gektar jer bólgen. Kásipkerlikti biryńǵaı qoldaý men damytýdyń «BJK-2020» baǵdarlamasy aıasynda paıyzdyq stavkany sýbsıdııalaý arqyly 150 mln teńge kóleminde qaryz qarajaty berildi. Jobanyń jalpy quny - 450 mln teńge.
Shıpajaıǵa Shyǵys Qazaqstan oblysynan ákelingen 150-den asa maral ákelinedi. Fermada barlyǵy 30 adam eńbek etpek. Keleshekte maral múıiziniń negizinde bıologııalyq qospalar shyǵarý josparda bar.
Shıpajaıdyń alǵashqy kelýshileri 25 maýsymda keledi dep kútilýde. Pantoterapııa kýrsynyń uzaqtyǵy 5-10 kún.
