Aqtóbe oblysynda «Bıznestiń jol kartasyn» iske asyrýǵa 5 mlrd teńge bólindi
AQTÓBE. QazAqparat - Aqtóbe oblysynda «Bıznestiń jol kartasy 2025» baǵdarlamasyn júzege asyrý úshin 5 mlrd teńge bólindi, dep habarlaıdy QazAqparat tilshisi.
«BJK-2020» baǵdarlamasyna bólingen qarjy byltyrmen salystyrǵanda eki ese kóp. Kem degende 350 bıznes-jospardy qoldaý josparlanǵan. Onyń 210-y maquldandy.
«Óńirler arasynda oblys baǵdarlamany júzege asyrý belsendiligi jaǵynan ekinshi pozıtsııada tur. Jobalardyń deni Aqtóbe qalasy, Muǵaljar jáne Hromtaý aýdandarynda», - dep dedi oblystyq kásipkerlik basqarmasynyń basshysy Nurhan Tileýmuratov.
Baǵdarlama aıasynda nesıe ústemaqysyn sýbsıdııalaý, kepildikter, granttar berý, ınfraqurylymdar júrgizý syndy jumystar atqarylýda. Jyl basynan beri 311,7 mln teńgege 15 kásipkerlik nysanyna ınfraqurylym júrgizildi. Aýylda bıznestiń barlyq túrine, Aqtóbe qalasy boıynsha óńdeý salasyna jáne ekonomıkanyń basym sektorlaryna ınfraqurylym júrgizilýde.
«Batys-2 shaǵyn aýdanynda salynyp jatqan 600 oryndyq mektepke, «TK Farm Aqtóbe» JShS, Baıǵanın aýdanydaǵy gaz óńdeý zaýytyna, kempıngterge, sharýa qojalyqtaryna, taýarly sút fermalaryna, jylyjaılarǵa, demalys oryndaryna jáne basqa da bıznes nysandarǵa kommýnıkatsııa tartyldy. Sondaı-aq osy jyly qarjylandyrý 3,5 ese ósip, 140 mln teńgege ósti. 2020 jyldan bastap granttardyń eń az mólsheri 2 mln teńge dep bekitildi. Kóbi 5 mln teńgeni quraıdy. Bul neǵurlym sapaly jobalardy qoldaýǵa múmkindik beredi. Budan ózge, erejelerge ózgerister engizilgen: basym baǵyttardyń jobalary qaralatyn bolady, ıaǵnı, monsha, shashtaraz, qoǵamdyq tamaqtaný men saýda oryndary qabyldanbaıdy», - dedi N.Tileýmuratov.
Áleýmettik jaǵynan osal toptarǵa, І, ІІ toptaǵy múgedekterge, UOS qatysýshylary men múgedekterine, jasyna baılanysty zeınetke shyqqandarǵa, kópbalaly analarǵa, tolyq emes otbasylarǵa jeńildikter qarastyrylǵan. Olardan óz qarajattarymen 10% mólsherinde qosymsha qarjylandyrý talap etilmeıdi. 2020 jyldyń jeti aıy ishinde barlyq baǵdarlamalardyń aıasynda 800-den astam shaǵyn jáne orta bıznes jobalary qoldaý tapty. Óńdeý salasy (26%), kólik qyzmeti (26%), saýda salasy (17%), bilim (10%), densaýlyq saqtaý, týrızm, aýyl sharýashylyǵy jáne t.b jekelegen salalar basym tústi.
