Aqtóbe oblysynda bıyl taǵy on aýyl gazben qamtylady
Memleket basshysy qoıǵan mańyzdy mindetterdiń biri - eldimekenderdi gazdandyrý.
Óńir basshysy Eraly Toǵjanovtyń tóraǵalyǵymen ótken jıynda Aqtóbe oblysynda Prezıdent tapsyrmalarynyń oryndalý barysy qaraldy.
Jıynǵa birqatar memlekettik organ basshylary jáne Aqtóbe qalasy men aýdan ákimderi qatysty.
Bıyl Aqtóbe oblysynda on eldimekenge gaz keledi. Energetıka jáne turǵyn úı-kommýnaldyq sharýashylyǵy basqarmasynyń basshysy Erjan Muzdybaevtyń aıtýynsha, jyldyń qorytyndysy boıynsha oblystaǵy 835 myń adam nemese óńir halqynyń 93,4 paıyzy turatyn 152 eldimeken kógildir otynmen qamtylady.
2022-2025 jyldar ishinde 76 eldi mekendi gazdandyrý mindeti qoıyldy. Nátıjesinde gazben qamtylǵan turǵyndardyń úlesi 97,6 paıyzǵa jetedi.
«Qor bar, óńirdiń ótkizý múmkindigin ulǵaıtýmen aınalysý kerek. Bári gazben qamtylýy tıis. Búginde oblysta Oıyl jáne Yrǵyz aýdandary gazben az qamtylǵan. Oıyl aýdanynda 22 eldi mekenniń tek úsheýine, Yrǵyz aýdanynda 18 aýyldyń beseýine ǵana gaz kirgen. Osy aýdandar boıynsha jumysty kúsheıtý qajet»,- dep atap ótti Eraly Toǵjanov.
Budan bólek, jol boıyndaǵy jas kóshetterdi kútip-baptaýǵa, sý qoımalaryn salýǵa, sýarmaly jerler alańyn keńeıtýge, eldi mekenderdi abattandyrýǵa qatysty ózekti máseleler talqylandy.
Osy aptada oblysta sanıtarııalyq tazalaý, abattandyrý jáne kóshet otyrǵyzý boıynsha eki aılyq bastalady.
Sondaı-aq tazalyq saqtaý maqsatynda qoǵamdyq oryndarda, qoqys alańdarynda beınebaqylaý kameralaryn kóbeıtý týraly sheshim qabyldandy.
