Aqtóbe oblysynda bir jarym jylǵa jetetin jemshóp daıyndalady

AQTÓBE. QazAqparat – Aqtóbede bıyl 2,7 mln tonna mal azyǵy daıyndalady. Onyń 80% jınaldy, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Aqtóbe oblysynyń ákimi Ońdasyn Orazalın jemshóp daıyndaýǵa qatysty jıyn ótkizip, oǵan birqatar memlekettik organ basshylary, Aqtóbe qalasy men aýdan ákimderi beınebaılanys arqyly qatysty.

Oblys ákimi jemshóp daıyndaý, qordy jınaý jumystaryn jandandyrýdy atap ótti.

Aıta keteıik, bıyl oblys boıynsha barlyǵy 2,7 mln tonna nemese bir jarym jylǵa jetetin shóp qory daıyndalady. Búginde onyń 80 paıyzy jınaldy.

Ońdasyn Orazalın jemshóptiń halyqqa qoljetimdi baǵada satylýyn erekshe baqylaýda ustaýdy tapsyrdy.

Osy maqsatta aýdan ortalyqtary men basqa da eldimekenderde arnaıy jármeńkeler uıymdastyrylady.

Budan bólek, óńir basshysy Aqtóbe qalasy men oblys aýdandarynyń ákimderine, quzyrly memlekettik organdarǵa astyq jınaý naýqany men jylytý maýsymyna daıyndyqty erekshe baqylaýda ustaýdy tapsyrdy.

Ásirese áleýmettik nysandarǵa kómir satyp alý jáne halyqty qamtý sharalaryn qabyldaý tapsyryldy.