Aqtóbe oblysynda bir mektep jabyldy
Aqtóbe oblysy boıynsha jańa oqý jylynda 428 orta bilim beretin mektep jumys isteıdi. Jańa oqý jylynda eki mektep qoldanysqa beriledi. Bireýi Aqtóbe qalasy Batys-2 shaǵyn aýdanyndaǵy «Smart Bilim» jeke mektebi, ekinshisi Alǵa aýdany Marjanbulaq aýylyndaǵy 300 orynda mektep. Sonymen birge óńirde oqýshy sany az bilim ordalary da bar.
«Aqtóbe oblysynda 6 mektepte bala sany 5-10 oqýshy arasynda. Aldaǵy ýaqytta bul jerlerge jańa bilim ordasyn salý qarastyrylyp otyrǵan joq. Zańnamaǵa sáıkes bastaýysh mektep bolýy úshin 5, negizgi mektep úshin 40, orta mektep úshin 80 baladan joǵary bolýy shart. Keıbir mektepter normatıvten tómen bolsa da jumys istep tur. Óıtkeni mektep jabylsa, aýyl taǵdyry bulyńǵyr. Aqtóbede mektep jabý máselesi kóp kóterilmeıdi. Bıyl tek Egizata atyndaǵy bastaýysh mektep jabylady. Sebebi munda byltyr 5 oqýshy bilim aldy. Bıyl ekeýi kóship ketip, úsheýi qaldy. Ata-analarmen aqyldasyp, balalardy Mártók aýdany ortalyǵyndaǵy orta mektep-ınternatqa kóshirýge kelisim jasaldy», - dedi Aqtóbe oblystyq bilim basqarmasy basshysynyń orynbasary Nurgúl Bertileýova.
Aqtóbede mektebi joq eldimekender de bar. Bastaýysh, negizgi mektebi bar, biraq orta mektebi joq aýyl balalary tasymaldanady.
«Mektebi joq 45 eldimekende 254 bala turady. Ol balalardyń 122-i kúndelikti tasymaldanady. Al 132 bala mektep janyndaǵy ınternatqa ornalastyrylady. Oblys boıynsha 109 avtobýs balalardy tasymaldaýǵa arnalǵan. Jańa oqý jylynyń aldynda bári tıisti tehnıkalyq tekserýden ótti. Aqtóbe qalasynda da saıajaı aýmaǵynda turatyn balalar da tasymaldanyp júr. Olardyń sany 8 myńnan asady. Jyl basynan beri 20, 40 oryndy avtobýs alynyp, tehnıka jańartylyp jatyr», - dedi Nurgúl Bertileýova.