Aqtóbe oblysynda bilim mekemelerindegi ashanalar jumysyna ruqsat berildi

AQTÓBE. QazAqparat – Aqtóbe oblysynda mektep, kolledj, ýnıversıtet ǵımaratynda ornalasqan ashanalardyń jumysyna ruqsat berildi. Búgin óńirde bas memlekettik sanıtarııalyq dárigerdiń jańa qaýlysy shyqty, dep habarlaıdy QazAqparat tilshisi.

Qaýlyǵa sáıkes, Aqtóbe oblysy aýmaǵynda karantındik shekteý sharalary jeńildetildi. Bul joly aýyldardaǵy meshitterde ótetin juma namazyna qatysýǵa ruqsat bar. Alaıda, talap boıynsha adam sany 150-den aspaýy shart.

«Bes ýaqyt namazdy meshitte oqýǵa ruqsat berildi. Tek adam sany 100-den asyp ketpeýi tıis. Al aýyldyq jerlerde juma namazy kezinde adam sany 150-den joǵary bolmaýy qajet. Sonymen birge teatr, kınoteatr, kontsert zaldarynyń 50 paıyzyna adam jınaýǵa bolady», - dep jazylǵan oblystyq Sanıtarııalyq-epıdemıologııalyq baǵylaý departamentiniń qujatynda.

Budan bólek, mektep, orta jáne joǵarǵy oqý uıymdaryndaǵy qoǵamdyq tamaqtaný obektileriniń qyzmetine ruqsat berildi. Saýda, oıyn-saýyq oryndaryndaǵy muz aıdyndarynyń qyzmeti de qaıta jandanady. Munda áleýmettik qashyqtyq saqtalyp, adamdar betperde taǵýy tıis.