Aqtóbe oblysynda balyq qyrylǵan sý qoımasynan synama alyndy

AQTÓBE. QazAqparat - Aqtóbe oblysyndaǵy Jekesaı ózeninde balyqtyń qyrylýyna qatysty sý qoımasynan jáne óli balyqtan synama alyndy, dep habarlaıdy QazAqparat Ekologııa, geologııa jəne tabıǵı resýrstar mınıstrligine silteme jasap.

Mınıstrliktiń baspasóz qyzmetiniń málimetinshe, 2020 jylǵy 19 səýirde Mınıstrliktiń Orman sharýashylyǵy jəne janýarlar dúnıesi komıteti ınspektsııasy jumyskerleri Jekesaı sý qoımasyn tekserý úshin Temir aýdanyna barǵan.

Tekserý barysynda sý qoımasynyń Temir aýdanyndaǵy Temir qalasynan 12 shaqyrym, oblys ortalyǵynan 160 shaqyrymda ornalasqany anyqtaldy. Ol balyq sharýashylyǵy sý qoımalarynyń tizimine kirmeıdi. Jekesaı sý qoımasy toǵandyq jylǵaǵa jatady. Úıilgen topyraq túrindegi bógeti bar. Qazirgi ýaqytta sýdyń uzyndyǵy 120 metr, eni 30 metr, ortasha tereńdigi 1 metr, jylǵa túrinde kórinis tapqan.
«Sýdyń túsi jasyl, bógde ıis bilinbeıdi. Jaǵalaý boıynan birneshe jerde salmaǵy 20 gramm shamasynda 300 dana óli móńke balyq tabyldy. Balyqtar ıistenip, keýip ketken. Jergilikti turǵyndardan surastyrǵan kezde, óli balyqtardyń shamamen 28-29 naýryzda muz erigen ýaqytta tabylǵany belgili boldy. Sý qoımasynyń lastanýyna jol bermeý úshin 400 keli óli balyq jergilikti turǵyndardyń kúshimen jınastyrylyp, mal qorymynda joıyldy», delingen habarlamada.
Sý qoımasyna 5 shaqyrym qashyqtyqta óndiristik jəne aýyl sharýashylyǵy nysany joq.
«Sýdan jəne óli balyqtan zertteý úshin synama alyndy. Boljam boıynsha, balyqtardyń qyrylýyna aýanyń jetispeýi sebep bolýy múmkin», delingen habarlamada.