Aqtóbe oblysynda balabaqsha máselesi 100% sheshiledi
AQTÓBE. QazAqparat - Bıyl Aqtóbe oblysynda balabaqshamen qamtý 100 paıyzǵa jetedi. Bul týraly óńir basshysy Berdibek Saparbaev halyq aldynda esep berýi kezinde aıtty, dep habarlaıdy QazAqparat tilshisi.
3-6 jas aralyǵyndaǵy balalardy balabaqshamen qamtý ótken jyly 98 paıyzdy quraǵan.
«Ótken jyly 44 balabaqsha ashyldy. Sóıtip balabaqshamen qamtý 98 paıyzdyq kórsetkishke jetti. Bıyl sony 100 paıyzǵa jetkizýimiz kerek», - dedi aımaq ákimi.
Aıta keteıik, Aqtóbe oblysynda ótken jyly 15 mektep paıdalanýǵa berildi. Bıyl taǵy 15 mekteptiń qurylysy aıaqtalatyny josparlanýda.
«Mektepter kompıýtermen qamtamasyz etildi. Tsıfrlandyrý jumysy jalǵasyp, Aqtóbede Nazarbaev Zııatkerlik mektebiniń ádistemesin ózge mektepterge engizý isi atqarylady», - dedi B.Saparbaev.
Eske salaıyq, óńir basshysy esep berý kezdesýinde, sondaı-aq kópbalaly analarǵa kómek berý joldaryn túsindirdi.
Budan bólek, sý tasqynynan zardap shekken Mahambet aýylynyń turǵyndaryn kóshirý máselesi kóterildi.
Bıyl oblysta 1 mıllıon sharshy metr turǵyn úıdi paıdalanýǵa berý josparlanǵan.
