Aqtóbe oblysynda Áıteke bıge eskertkish ornatyldy

Mundaı jańa­lyq­tar men jaqsylyqtar Táý­el­sizdiktiń 25 jyldyǵy aıasynda burynǵydan da kóbeıe tústi. Osyndaı bir aıtýly da aıshyqty oqıǵa - Qarabutaq aýylynda Qazaq jurtynyń tynyshtyǵy men tutastyǵy jolynda kósemdigimen de, sheshendigimen de qyzmet etken daraboz tulǵa, eldiń birligin nyǵaıtýǵa úles qosqan ataqty úsh bıimizdiń biri - Áıteke bı eskertkishiniń ashylýy der edik.

Tóle jáne Qazybek bılermen birge qalyń qazaǵynyń muńyn muńdap, joǵyn joqtaǵan Áıteke bı - fılosof, dala danyshpany, memleket qaıratkeri. Ol 25 jasynda Kishi júzdiń bas bıi bolǵan, Áz Táýke han qurǵan bıler keńesiniń múshesi, abyz baba, daraboz tulǵa qandaı qurmetke de laıyq. Áıteke bıdi este qaldyrý baǵytynda biraz sharýalar da jasaldy. Oblys ortalyǵynda eskertkishi ornatyldy. Onyń atyn­da aýdan, kósheler, aýyl bar. Osy Qarabutaq óńirinde Áıteke bıdiń 350 jyldyǵy atalyp ótti. Ǵylymı-praktıkalyq konferentsııalar ótkizilýde. «Áıteke bı» atyndaǵy qaıyrymdylyq qory jumys isteıdi, dep jazady Egemen Qazaqstan.

Bıiktigi 7 metr bolatyn Áı­teke bıdiń eskertkishi Qara­bu­taq aýy­ly­n­a kireberistegi úsh jol­dyń, «Batys Eýropa - Ba­tys Qytaı» halyqaralyq kólik dáli­ziniń Qyzylorda baǵytyna jáne Qos­tanaı baǵytyna burylatyn aı­ryǵyna ornatylǵan. Munyń ózi - úsh baǵytqa júretin avto­kó­­lik júrgizýshileri men jolaýshylardyń nazaryna birden iligetin kórnekti oryn.

Bul eskertkishti ornatýǵa «Qazavtojol» UK» AQ Aqtóbe ob­lystyq fılıalynyń dırektory Baǵlan Baımaǵambetov pen bas merdiger, «Qazavtojol» res­pýblıkalyq memlekettik kásip­orny Aqtóbe oblystyq fılıa­lynyń dırektory Ákimjan Óte­muratov bastamashy boldy.

«Áıteke bı babamyzǵa bir ádemi eskertkish ornatý kóp­ten beri oıda júr edi. Sony aqyl­d­asa kele, osy úsh joldyń aıry-­ǵyna qoıýdy sheshtik. Mú­sin­shi Aıapbergen Qarpyqovtyń qo­lynan shyqqan eskertkish eńseli de kórnekti. Bul aqtóbelik jol­shylardyń Táýelsizdiktiń 25 jyl­dyǵyna jasaǵan tartýy dese de bolady. Bul baǵyttaǵy sharýa­lardy alda da jalǵastyramyz. Batyrlarymyzdy, handarymyzdy jáne bılerimizdi, Alashtyń aıtýly tulǵalaryn este qaldyrý arqyly Táýelsizdiktiń qadir-qasıetin jastarǵa ónege-úlgi etý­diń tárbıelik máni zor», - deıdi «Qazavtojol» UK» AQ Aqtóbe oblystyq fılıalynyń dırektory Baǵlan Baımaǵambetov.

Onyń aıtýynsha, eskertkish mańaıyn kóriktendirý jáne kó­galdandyrý jumystary kóktem shyǵa bastalady. Eskertkish tuǵy­ryna keler urpaqqa joldaý jazylǵan kapsýl salyndy. Osy jerge «Qazaqstan Res­pýblıkasynyń Táýelsizdigine - 25 jyl» dep ja­zylǵan stella ornatylǵan. Eskert­kishti Áıteke bı aýdanynyń ákimi Málimbet Ybrashev pen eńbek arda­geri, Áıteke bıdiń tikeleı urpaǵy Sársenáli Qaltaev ashty. Áıteke bı babamyzǵa as berilip, Quran baǵysh­taldy.