Aqtóbe oblysynda avtojoldarda jyl basynan 53 adam kóz jumdy
Aqtóbe oblystyq Polıtsııa departamenti baspasóz qyzmetiniń málimetinshe, bıyl jol apattarynyń sany artty. Jyl basynan beri 303 oqıǵa tirkelip, onda 53 adam mert boldy. Al 412 adam túrli jaraqat aldy. Júrginshilerdiń jol erejesin buzýy, júrgizýshilerdiń jyldamdyqty asyrýy, qarsy baǵytqa shyǵyp ketý negizgi sebep bolyp otyr.
«Rýlge mas kúıinde otyratyn adamdardyń kesirinen 10 jol-kólik apaty boldy. Saldarynan eki adam kóz jumyp, 15-i jaralandy. Polıtsııa qyzmetkerleri qaýipsizdik beldigin taqpaǵan 4 myńnan astam júrgizýshini anyqtady. Al 1558 júrgizýshi kólik júrgizý kezinde uıaly telefondy paıdalanyp, 52 myńnan astamy jyldamdyqty asyrǵan. Sondaı-aq jaıaý júrginshiler tarapynan 6 myńnan astam buzýshylyq anyqtaldy. Qarsy qozǵalys jolaǵyna shyǵýdyń 662 deregi, baǵdarshamnyń tyıym salatyn sıgnalyna ótýdiń 1920 deregi tirkeldi», - dep habarlady Aqtóbe oblysy PD JPQB bastyǵynyń orynbasary Aıdos Quljanov.
Aıta keteıik, oblystyń barlyq aýdanynda joldyń apatty-qaýipti ýchaskelerinde patrýldik avtokólikter men úı janýarlarynyń maketi ornatyldy. Túngi ýaqytta mashınanyń jaryǵynan maketter kórinedi. Sol kezde júrgizýshiler mindetti túrde qozǵalys jyldamdyǵyn tómendetedi.
