Aqtóbe oblysynda aýyl turǵyndarynyń gazdan ýlaný sebebi belgili boldy

ASTANA. QazAqparat – Aqtóbe oblystyq densaýlyq saqtaý basqarmasy bastyǵynyń orynbasary Bekbolat Orazbaev óńirdegi gazdan ýlanǵan 5 aýyl turǵynynyń densaýlyǵyna qatysty málimetti jarııalady, dep habarlaıdy QazAqparat tilshisi.

«4 qyrkúıek kúni saǵat keshki 22-00-de shaqyrtý túsip, Keńqııaq aýrýhanasyna 8 adam, onyń ishinde 4 bala jetkizildi. Olar aýrýhanaǵa jetkizilgen sátte bas aýyrýyna, bas aınalýyna shaǵymdandy. Tekserý júrgizilgennen keıin 4 patsıent úılerine jiberilip, tórteýi dárigerlerdiń qadaǵalaýyna alyndy. Qaıta tekserý kezinde qandaı da bir ózgeris bolmaǵannan keıin qalǵan 4 adam da úılerine jiberildi. Qaıtadan shaqyrtý bolǵan joq. Balalardyń jastary – 5 pen 11 jas aralyǵynda», - dedi ol.

Onyń atap ótýinshe, naýqastar aýrýhanaǵa jetkizilgen sáttegi shaǵymdardyń negizinde olarǵa «gazdan ýlaný» dıagnozy qoıylǵan.

Al Temir aýdanyna gaz tasymaldaý jáne gaz qubyrlaryna tehnıkalyq qyzmet kórsetýmen aınalysatyn «Tehnogaz» kompanııasynyń bas dırektory Rýslan Ámirtaev turǵyndardyń gazdan ýlanýyna qatysty aldyn ala sebepterin aıtady. Onyń atap ótýinshe, oǵan «odorant» sebep bolýy múmkin. Bul qospa gazǵa ıis berý úshin qosylady.

«Gaz taratý jelisindegi josparly jumys aıaqtalǵannan keıin «odorant» qostyq. Biraq, ony normadan artyq qosyp jibergen sııaqtymyz», - dedi ol.

Aıta keterligi, osy oqıǵadan keıin Keńqııaq, Shubarshı, Qumsaı, Qopa jáne Sarykól aýyldarynyń turǵyndary ózderin jaısyz sengendikterin aıtqan.

Buǵan deıin Keńqııaq aýylynyń aýrýhanasyna 8 turǵyn gazben ýlaný belgilerimen júgingenin jazǵan edik.

https://kaz.inform.kz/news/aktobe-oblysynda-auyl-turgyndary-gazga-ulanyp-auruhanaga-tusti_a4108154