Aqtóbe oblysynda «Aýyl amanaty» jobasy qolǵa alynady
Aqtóbe oblysy halyqynyń tabysyn arttyrý maqsatynda «Aýyl amanaty» ishki baǵdarlamasy iske qosylady. Pılottyq joba alǵash ret Jambyl oblysynda synaqtan ótken. Ol kezde aýyl turǵyndaryna jeke qosalqy sharýashylyqtary men agrarlyq bıznesterin damytýǵa jyldyq mólsherlemesi 2,5 paıyzdyq jeńildetilgen zaem berildi. Kooperatıv qurýda jáne lızıngige tehnıka rásimdeýde qoldaý kórsetildi.
«Halyq tabysy ortasha alǵanda eki ese artty. Aýyl turǵyndarynyń 38% turaqty jumysqa ornalasty. Ataýly áleýmettik tólem alatyndar sany 68% azaıdy. 11 myń gektar aýylsharýashylyq jerleri aınalymǵa engizildi.
Mal basynyń 28% artýy, et pen sút óńdeý kásiporyndarynyń ashylýy, ósimdik sharýashylyǵy, onyń ishinde kókónis ónimderiniń 25% artýy oń mýltıplıkatıvti nátıje boldy. Bul eki jyl ishinde qol jetkizgen naqty nátıjeler.
Sonymen birge qaryzǵa berilgen qarajatty qaıtarý deńgeıi 98,9 % qurady. Jalpy, joba aıasynda qaryzǵa berilgen 9,2 mlrd teńgeniń 37 paıyzy qaıtaryldy. Bul aqshalar jańartpaly mehanızm bolyp basqa aýyldardy damytýǵa jiberiledi», - dep atap ótti Eraly Toǵjanov.
Tamyz aıynyń ortasynda Aqtóbe oblysynda jobanyń maqsat-mindetterin túsindirý jóninde aqparattyq marafon bastaldy. «Aýyl amanaty» jobalyq keńsesiniń basshysy Nurken Sharbıev mobıldi toptar Aqtóbe oblysynyń 26 aýylynda kezdesý ótkizgenin jetkizdi. E.Toǵjanovtyń tapsyrmasymen jergilikti atqarýshy organdar túsindirý jumystaryn jalǵastyrady. Budan bólek, oblys ákimi jobaǵa qatysatyn pılottyq aýyldyq okrýgterdi anyqtaıtyn skrınıgti qysqa merzimde aıaqtaýdy tapsyrdy. Ár eldi mekenniń geografııalyq erekshelikteri, jer máselesi, sýmen qamtylýy, eńbek jáne qarjy resýrstary eskeriledi. Búginde oblystaǵy 62 eldi mekenniń skrınıngi aıaqtaldy.
«Aýyl amanaty» jaqsy áleýmettik-ekonomıkalyq nátıje kórsetti. Ony sapaly júzege asyrsa aýyl turǵyndarynyń tabysy men turmys sapasyn kóterý múmkin bolady. Bul Prezıdenttiń tikeleı tapsyrmasy. Jobanyń Aqtóbe oblysynda barynsha jedel ári tıimdi júzege asyrylýy úshin bar kúsh-jigerdi salý kerek», - dedi oblys ákimi E.Toǵjanov.
