Aqtóbe oblysynda «Aýyl amanaty» jobasy iske asyryla bastady
Jańa jobany iske qosý kezinde arnaıy forým uıymdastyryldy. Oǵan Aqtóbe oblysynyń ákimi Eraly Toǵjanov, memlekettik organ basshylary, aýdan, aýyldyq okrýg ákimderi, aýylsharýashylyq salasynyń ardagerleri jáne agrotaýar óndirýshiler qatysty.
«Memleket basshysy Qasym-Jomart Toqaev aýyl sharýashylyǵy el ekonomıkasynyń jańa qozǵaýshy kúshi bolatynyn aıtyp ótti. Atalǵan salada 350 myńnan astam jańa jumys orny qurylady. Jalpy kooperatıvterdi damytý úshin bıýdjetten 1 trıllıon teńgeden astam qarajat jumsalady. Prezıdent tapsyrmasyna sáıkes, aldaǵy úsh jyl aýyldy damytýǵa arnalady.
Aqtóbe oblysy Memleket basshysynyń tapsyrmasyn alǵashqylardyń biri bolyp oryndap jatqanyn maqtanyshpen aıta alamyn. Búgin óńirde halyqtyń tabysyn arttyrýǵa baǵyttalǵan «Aýyl amanaty» jobasy bastalyp jatyr. Jobaǵa qatysatyn aýyldar tolyqtaı skrınıngten ótkizilip, áleýmettik portreti anyqtaldy. Skrınıng nátıjesinde, naqty jumyssyzdar men ózin-ózi qamtýshylar sany, ár otbasynyń tabysy aıqyndaldy. Sondaı-aq, mal jáne qus eti, kókónispen qamtamasyz etilý deńgeıin, damytýǵa qajetti óndiris túrlerin belgiledik», — dep atap ótti Eraly Toǵjanov.
Jobaǵa barlyq 12 aýdandaǵy 24 aýyldyq okrýgtiń 42,4 myń turǵyny qatysa alady. Olardyń jartysynan astamy ekonomıkalyq belsendi halyq sanatyna jatady. Atalǵan aýyldarda 747 turǵyn jumyssyz retinde tirkelgen. Al ózin-ózi jumyspen qamtyǵan jáne turaqty tabys kózi joq turǵyndar sany 5 myńnan asady. Ataýly áleýmettik kómekti 151 otbasy alyp otyr.
Aldyn ala túsindirý jumystary júrgizildi. «Aýyl amanaty» jobasy aıasynda olar qus jáne ósimdik sharýashylyǵyn damytý, kooperatıvterdi jabdyqtaý, aýyl sharýashylyǵy ónimderin qaıta óńdeý jáne tamaq ónimderin shyǵarý úshin shaǵyn jáne orta bıznes ashyp, damytý boıynsha 2772 jobany júzege asyrady.
«Jobany qarjylandyrýǵa bıyl respýblıkalyq bıýdjet esebinen 3 mlrd teńge bólindi. 2023 jyly qarajat kólemi artady. Sonymen qatar aýyl turǵyndaryna bólingen qarajattan bólek, iri sharýa qojalyqtary esebinen taýarlyq nesıe retinde 6 myń basqa jýyq mal beretin bolamyz. Osy sátti paıdalana otyryp, iri sharýashylyq basshylaryna rızashylyǵymdy bildirgim keledi. «Aýyl amanaty» jobasyn iske asyrý aýyldyq eldi mekenderde jańa jumys oryndaryn qurýǵa, mal men qustyń sanyn kóbeıtýge, shaǵyn kásipkerlik ashýǵa jáne azyq-túlik qaýipsizdigin qamtamasyz etýge múmkindik beredi. Bul joba aýyl sharýashylyǵyn damytyp, aýyldyń berekesin kóterýge áser etetini anyq. Baǵdarlamany ári qaraı ár aýylda júzege asyrý maqsatynda ár aýdan, ár aýyl boıynsha áleýmettik-ekonomıkalyq keshendi jospar ázirleýge tapsyrma berdim», — dedi Eraly Toǵjanov.
«Aýyl amanaty» jobasy boıynsha qarajat berý tetigi barynsha jeńildetilgen. Jobaǵa qatysýshylar aýyldaǵy úıin kepilge qoıyp, 2,5% jeńildetilgen nesıe ala alady. Sonymen birge qaryzdyń jalpy merziminiń alǵashqy úshten bir bóligine kredıttik demalys alý quqyǵy bar. Revolverlik ádispen qaıtarylatyn qarajat jańa jobalardy qarjylandyrýǵa baǵyttalady. «Aýyl amanatyna» qatysýshylar jeke qosalqy sharýashylyqtar retinde kooperatıvterdiń quramyna kiredi. Bul aýyl sharýashylyǵy tehnıkasyn satyp alýǵa 50% deıin sýbsıdııa alýǵa, ónimdi qaıta óńdeý jáne ótkizý protsesterin júıeleýge múmkindik beredi.
Jobany júzege asyrý nátıjesinde oǵan qatysatyn eldi mekenderdegi jumyssyzdyq deńgeıi 41,4% tómendeıdi, ataýly áleýmettik kómek alatyndar qatary 885-ten 449-ǵa azaıady. Sondaı-aq, turǵyndardyń ortasha tabysy 172 myń teńgeden 330,3 myń teńgege, ıaǵnı eki ese artady dep boljanyp otyr. Budan ózge sarapshylardyń esebinshe, qus etimen qamtamasyz etý 20,6%-dan 51,2%-ǵa deıin, kókónister 17,4%-dan 29,9%-ǵa deıin, kartop 38,8%-dan 63,5%-ǵa deıin ósedi.