Aqtóbe oblysynda «Aýyl amanaty – Babalar amanaty» respýblıkalyq forýmy ótti
Bul týraly QazAqparat Aqtóbe oblysy ákimdiginiń baspasóz qyzmetine silteme jasap habarlaıdy.
Oblys ákimi Eraly Toǵjanov forýmǵa qatysýshylardy quttyqtap, Aqtóbe oblysynyń Qazaqstanda alǵash bolyp iske asyrǵan bul jobasy aýyldyń damýyna, halyqty sapaly azyq-túlikpen qamtamasyz etýge, óńir turǵyndarynyń jumys oryndary men tabystaryn ulǵaıtýǵa yqpal ete otyryp, el ekonomıkasynyń jańa qozǵaýshy kúshi bolatynyn atap ótti.
Óńir basshysy «Aýyl amanatyna» úlken úmit artyp, joba halyqtyń aýyldardan qalaǵa údere kóshýi sııaqty kúrdeli máseleni sheshedi dep esepteıdi.
«Memleket basshysy Qasym-Jomart Toqaev óziniń alǵashqy Jarlyǵynda aýyl turǵyndarynyń ál-aýqatyn arttyrýǵa erekshe nazar aýdara otyryp, aýyldardy damytý tujyrymdamasyn ázirleýdi tapsyrdy.
Bizdiń óńir halqynyń 25,5%-y nemese 236 myń adam aýyldyq jerlerde turady. Sońǵy 4 jylda aýyl halqynyń sany 7,1%-ǵa azaıyp, 18 myń adamdy qurady. Kóshi-qon aǵymynda eńbekke qabiletti jastardyń úlesi basym. Osy sebepti biz aýyldyq eldimekenderdi damytýdaǵy praktıkalyq is-qımyldarǵa kóshýimiz kerek.
Byltyr elimizde alǵash ret «Aýyl amanaty» jobasy Aqtóbe oblysynda bastaý aldy. Biz aýyldyń máselelerin sheshpeı, qala máselelerin sheshe almaımyz», - dep atap ótti Eraly Toǵjanov.
Táýelsizdik alǵannan beri alǵash ret óńirdiń barlyq 134 aýyldyq okrýgine skrınıng júrgizildi, árbir okrýgtiń áleýmettik-ekonomıkalyq damý jospary ázirlendi, jumyssyz adamdardyń, AÁK alýshylardyń, ózin-ózi jumyspen qamtyǵandardyń tizimderi jasaldy. Halyqtyń bul sanattary erekshe nazar aýdarady.
«Aýyl amanatyn» iske asyrý arqyly jobaǵa qatysatyn aýyldardaǵy jumyssyzdyq deńgeıin 41,4%-ǵa, ataýly áleýmettik kómek alýshylardy 49,3%-ǵa tómendetedi. Otbasynyń ortasha tabysy 2 ese artady.
Budan ózge, árbir otbasynyń tabysynyń ortasha mólsherin, aýyldyń ekonomıkalyq áleýeti men naqty múmkindikterin, onyń ishinde jer resýrstaryn, jem-shóp pen sý qorlaryn anyqtaý boıynsha jumys júrgizildi.
Halyq tutynatyn 65 negizgi azyq-túliktiń ishinen oblys ózin tek 7 túrimen, 45 túri ishinara 1%-dan 69%-ǵa deıin tolyq qamtamasyz etedi.
Sonymen, qus etiniń 95%-ǵa jýyǵy shetelden jáne basqa aımaqtardan jetkiziledi, al ishki naryqty jergilikti kókónistermen qamtamasyz etý de 40%-ǵa jetpeıdi. Joba óz taýarlarymen qamtý deńgeıin arttyrýǵa baǵyttalǵan.
Qarjylyq nesıelendirýmen qatar, iri sharýa qojalyqtarynyń qoldaýymen taýarlyq nesıeleý tetigi aıasynda aýyl turǵyndaryna 6 myń bas mal berý josparlanýda. 28 sharýa qojalyǵy 70 otbasyna 165,6 mln. teńge somaǵa 865 bas mal berdi.
Búgingi forýmnyń qorytyndysy boıynsha 33 otbasy 75,8 mln. teńge somasyna 533 bas mal alady.
Sonymen qatar, ómir súrý úshin qolaıly jaǵdaılardy qamtamasyz etý boıynsha sharalar qabyldanýda. Aımaq basshylyǵy tsıfrlyq damý mınıstrligimen 67 aýyldy keńjolaqty mobıldi ınternetpen qamtamasyz etý týraly kelisimge qol qoıdy. Nátıjesinde oblystyń aýyl halqynyń 98,5%-y sapaly ınternetpen qamtamasyz etiledi.
«BІLІM ALL» óńirlik jobasy aıasynda turǵylyqty jerine qaramastan balalardyń teń bilim alýyna jaǵdaılar jasalǵan. Sondaı-aq aýyl turǵyndaryn sapaly medıtsınalyq qyzmettermen qamtamasyz etý boıynsha naqty sharalar qabyldandy.
Eraly Toǵjanov aǵa býyn, bıznes ókilderin aýyldyń damýy men abattandyrylýyna tıimdiligi joǵary jobalarǵa belsendi qatysýǵa jáne qoldaýǵa shaqyrdy.
QR Aýyl sharýashylyǵy vıtse-mınıstri Ábilqaıyr Tamabek óz baıandamasynda «Aýyl amanaty» jobasynyń respýblıkalyq deńgeıde iske asyrylý barysy týraly aıtty.
Ol aqtóbelik jobanyń qatysýshylaryna sáttilik tilep, Aqtóbe oblysynyń taýarlyq nesıeler berý tájirıbesi Qazaqstan aýmaǵyn qamtıtynyn alǵa tartty.
Óńirlik jobaǵa qatysýshylarǵa alǵashqy keńes berýden bastap ónimdi ótkizýdi uıymdastyrýǵa deıin olardyń quzyretin arttyrý úshin kásipkerler palatasy janynan «QAZYNA» pılottyq oqytý jobasy bastaldy. Aýylda shaǵyn jobalardy iske asyratyn jáne óz bilimderimen bólisýge daıyn belsendi, tabysty kásipkerler pýly qalyptasty.
«Memleket basshysynyń aýyldardyń ál-aýqatyn arttyrý týraly Jarlyǵyn júzege asyrý aıasynda «Aýyl amanaty» jobasyn bastaýdy aýyl turǵyndary oń qabyldady. Alǵys aıtý kúni qarsańynda barlyq aqtóbelikterdiń atynan Prezıdentke aýyldyń máselelerine qamqorlyq pen kóńil bólgeni úshin alǵys bildiremin.
Ókinishke oraı, qalada tapqan qarajaty jetispeıtin jastardy jıi kóremin. Olar aýyldarǵa oralyp, «Aýyl amanatyna» qatysýy kerek dep sanaımyn. Shynynda da, bul – olardyń materıaldyq jaǵdaıyn jaqsartýǵa, tabysyn arttyrýǵa tamasha múmkindik», - dedi aqsaqal Keldibaı Espaǵambetov oblys turǵyndaryna.
«Forým aıasynda biz tájirıbe almasyp qana qoımaı, áleýetti qatysýshylarǵa jobanyń naqty tetigin, is-qımyl algorıtmin taǵy da túsindirdik. Forým jumysyn qorytyndylaı kele, «Aýyl amanaty» jobasyna qatysýshylardy odan ári yntalandyratyn jańa kishi jobalar týraly jarııalaǵym keledi, olardy búgin bastaýǵa ruqsat beremin!»,- dedi oblys ákimi.
Óńir basshysynyń tapsyrmasy boıynsha bıylǵy jyly «Úzdik aýla», «Úzdik jeke qosalqy sharýashylyq», «Úzdik aýyl ákimi», «Úzdik aýyldyq kooperatıv» jáne t. b. 14 nomınatsııa boıynsha jeńimpazdardy anyqtaıtyn baıqaý jarııalandy.
Forým sońynda óńir basshysy kásipkerlermen memorandýmdarǵa qol qoıdy. Kásipkerler jalpy quny 1,7 mlrd mlrd.teńge somasyna «Abattandyrylǵan aýyl» jobasyn iske asyrýǵa úles qosýǵa nıetti.
