Aqtóbe oblysynda aýrýhanadan qashqan qylmysker qolǵa tústi

AQTÓBE. QazAqparat – Aqtóbe oblysynda kisi óltirdi dep aıyp taǵylǵan kúdikti aýrýhanadan qashyp ketti. Ol bir kúnnen soń ustaldy, dep habarlaıdy QazAqparat tilshisi.

Aqtóbe oblysy boıynsha Qylmystyq atqarý júıesi departamentiniń baspasóz qyzmetiniń habarlaýynsha, oqıǵa 23 qańtar kúni boldy. Jedel medıtsınalyq járdem aýrýhanasynyń hırýrgııalyq bólimshesinde emdelip jatqan A. jeksenbi kúni tańerteń qamaýdan qashyp ketti. Birden izdeý júrgizildi.

«Atalǵan fakti boıynsha oblystyq polıtsııa departamenti sotqa deıingi tergeýdi bastady (QR QK «Bas bostandyǵynan aıyrý oryndarynan, qamaqtan nemese kúzetten qashý» baby boıynsha). Oqıǵanyń sebepteri men mán-jaılaryn anyqtaý úshin QR ІІM Qylmystyq-atqarý júıesi komıteti qyzmettik tekserý júrgizip jatyr. Tekserý nátıjeleri boıynsha qoldanystaǵy zańnamaǵa sáıkes sharalar qabyldanady», - dep habarlady Aqtóbe oblysy boıynsha QAJ departamentiniń baspasóz qyzmeti.

Al búgin oblystyq PD baspasóz qyzmeti kúdiktiniń ustalǵanyn rastady.