Aqtóbe oblysynda ákim saılaýyna 115 kandıdat ótinish berdi
Búgin kandıdattardy tirkeý aıaqtaldy. Oblystyq saılaý komıssııasynyń tóraıymy Gúlnár Kúnbaeva úmitkerlerdi tirkeý jumysyn qorytyndylady.
«Barlyǵy 35 aýylda 74 saılaý ýchaskesi jumys isteıdi. Saılaý 84 eldimekende ótedi. Kóbi Áıteke bı aýdanyna tıesili. Munda 15 ýchaskede daýys sanaý júrgiziledi. Ótinish bergen 115 kandıdattyń 99-ynda qujaty durys. Al jeteýiniń qujaty zańnama talaptaryna saı kelmedi. Básekelestik bar. Ár okrýgke úsh adamnan keledi»,- dedi oblystyq saılaý komıssııasynyń tóraıymy Gúlnár Kúnbaeva.
Aıta keteıik, úmitkerlerdiń 67-i saıası partııa atynan usynyldy. Nur Otan partııasynan 29, «Aýyldan» 16, Qazaqstan halyq partııasynan 6, «Adaldan» 5, «Aqjol» partııasynan 9, Jalpy ulttyq sotsıal-demokratııalyq partııasynan eki adam usynyldy. Al 48 adam ózin-ózi usyndy.
115 úmitkerdiń 97-i er, ózgesi áıel. Ortasha jasy - 40 jas. Eń jasy 27 jasta, eń úlkeni 63-te. Oblystyq saılaý komıssııasynyń tóraıymy Gúlnár Kúnbaevanyń aıtýynsha, 62-i memlekettik, 31-i bıýdjettik sala qyzmetkeri.
Eske salsaq, 25 mamyrda Prezıdent Qasym-Jomart Toqaev saılaý týraly Konstıtýtsııalyq zańǵa ózgertýler men tolyqtyrýlar engizýdi kózdeıtin qujatqa qol qoıǵan bolatyn.
Ulttyq ekonomıka mınıstrligi aýyl ákimerin tikeleı saılaý qalaı ótetindigin jáne QR Prezıdenti Ákimshiligi Basshysynyń orynbasary Málik Myrzalın ákim saılaýyna túsetin kandıdattarǵa qoıylatyn talaptardyń sebebin túsindirdi.
Sondaı-aq, Memleket basshysy aýyl ákimderin saılaý máseleleri jóninde keńes ótkizdi.
