Aqtóbe oblysynda 80 mln teńgeniń maınıngke arnalǵan qurylǵylaryn alyp bara jatqandar ustaldy

NUR-SULTAN. QazAqparat - Shekarashylar Aqtóbe oblysyndaǵy «Jaısań» avtomobıl ótkizý pýnkti arqyly Qazaqstannan Reseıge shyǵatyn jerde «DAF» markaly avtokóligin ustady, dep habarlaıdy QazAqparat QR Ulttyq qaýipsizdik komıtetiniń baspasóz qyzmetine silteme jasap.

Kólik quralyn tolyq tekserý kezinde QR-dan ilespe qujattary joq sany 813 qorap pen arnaıy kabelderi bar «Avalon» maınıngke arnalǵan qurylǵy tabyldy.

Aldyn ala baǵalaý boıynsha ustalǵan júktiń quny shamamen 80 mln teńgeni quraıdy.

«Barlyq tehnıka protsessýaldyq sheshimder qabyldaý úshin Aqtóbe oblysy boıynsha Ekonomıkalyq tergeý departamentine tapsyryldy»,-delingen QR UQK baspasóz qyzmeti taratqan aqparatta.