Aqtóbe oblysynda 70 gektar aýmaqty sharpyǵan dala órti sóndirildi
AQTÓBE. QazAqparat - Saıası náýbet qurbandary jerlengen Túıetaý mańyndaǵy dala órti tolyqtaı sóndirildi. Bul týraly oblystyq tótenshe jaǵdaılar departamentiniń basqarma bastyǵy Evgenıı Ovcharskıı málim etti, dep habarlaıdy QazAqparat tilshisi.
«Dala órti jappaı mola jaılaǵan Túıetaýǵa jetpegen, taýdyń aınalasyndaǵy qýraǵan shópter órtengen. Belogorka jáne Shıli saı aýyldaryndaǵy dala órti 25-26 shildege deıin sozylyp, 70 gektar aýmaqty jalyn sharpydy. Tilsiz jaýdy memlekettik órtke qarsy qyzmet jáne erikti órt sóndirýshiler sóndirdi. Órttiń tutaný sebepteri tekserilip jatyr», - deıdi E.Ovcharskıı.
Jyl basynan beri óńirde 121 dala órti bolǵan. Bul ótken jylǵy kórsetkishten 15 paıyzǵa az.
E. Ovcharskııdiń aıtýynsha, bıyl órttiń aldyn alý sharalaryna 40 paıyz kóbirek qarajat bólingen. Qajetti qural-jabdyqtar satyp alynyp, órtke qarsy qurylymdar úshin oqý-jattyǵýlar uıymdastyrylǵan.
