Aqtóbe oblysynda 60 kólik jolda qaldy
AQTÓBE. QazAqparat - «Samara-Shymkent» jolynda qolaısyz aýa raıyna baılanysty 60 kólik qozǵalysyn toqtatty, olar aýa raıynyń jaqsarýyn kútip otyr, dep habarlaıdy QazAqparat QR ІІM TJK baspasóz qyzmetine silteme jasap.
Aqtóbe oblysynda 120 shaqyrym jolda barlyq kólik túrine qozǵalys jabyldy. Bul «Samara-Shymkent» jolynyń Dóń jáne Qarabutaq aýylynyń aralyǵy (843-965 km).
Sonymen qatar, Marjanbulaq jáne Qobda (703-618 km) aýylynyń aralyǵynda júk kóligi men qoǵamdyq kólik júrisi shekteldi.
Barlyq avtokólik qaýipsizdik úshin «Amanat» kempınginiń aýmaǵynda tur, onda ashana men qonaq úı bar. Aýa raıy jaqsarǵan soń olar ári qaraı saparyn jalǵastyrady.
Aıta keterligi, búgin «Samara-Shymkent» jolynda eki jol apaty boldy.
«Samara – Shymkent» tasjolynda kúndiz saǵat 13;45-te, Hromtaý qalasy mańynda, halyqaralyq trassanyń 859 shaqyrymynda 11 kólik jol apatyna ushyrady.
Eki júk kóligi, segiz jeńil kólik pen bir «Gazel» bir-birine soǵylǵan. Jol apatynda 9 adam zardap shegip, onyń beseýi Hromtaý qalasynyń aýrýhanasyna jatqyzyldy.
Ekinshi jol apaty Áıteke bı aýdanynda boldy. Betpe-bet soǵylǵan eki jeńil kóliktegi bir júrgizýshi men bir jolaýshy qaza tapty. Taǵy bir jolaýshy aýrýhanaǵa jetkizildi.
Qazir Aqtóbe oblysynyń Polıtsııa departamenti men Tótenshe jaǵdaılar departamenti kúsheıtilgen rejimde jumys istep jatyr.
QR ІІM aýa raıynyń qubylýyn, meteoboljam men SMS eskertýlerge qulaq asýdy suraıdy.
Vedomstvo boran kezinde joldyń kórinbeýi jáne kóktaıǵaqqa baılanysty júrgizýshilerge jyldamdyq rejimin saqtaýdy, toqtaǵan kezde avarııalyq belgilerdi iske qosý kerektigin eske salady.
