Aqtóbe oblysynda 58 jetim bala baspanaly boldy
«Baqytty bala» jobasy Bilim jáne ǵylym mınıstrligi tarapynan qoldaý tapty. Sonymen birge, oǵan qatysýǵa otbasy jáne bala máselelerimen aınalysatyn halyqaralyq uıymdar, qaıyrymdylyq qorlary nıet bildirdi. Basty maqsat - balalarǵa, olardyń ıntellektýaldyq, fızıkalyq, rýhanı-adamgershilik jaǵynan damýlaryna qolaıly jaǵdaı jasaý.
Búginde joba barlyq segiz baǵyt boıynsha tabysty júzege asyrylyp jatyr.
Bilim basqarmasynyń málimetinshe, «Balalardyń ІT álemi» baǵyty aıasynda 20 mektepti ınteraktıvti jabdyqtarmen, keshendi robot tehnıkalarymen, 3D-prınterlermen jabdyqtaý jalǵasýda. Bul jumys búginde Qobda, Mártók, Oıyl, Temir jáne Hromtaý aýdandarynda tolyqtaı aıaqtaldy. Erekshe qajettiligi bar balalardyń quqyǵyn qamtamasyz etý jáne ómir súrý sapasyn jaqsartý sharalary qabyldanýda. Bul úshin «Kedergisiz bilim» is-sharalarynyń jekelegen blogy jasalǵan. Erekshe balaqaılarǵa arnalǵan balabaqsha men jyl boıy jumys isteıtin Qazaqstandaǵy tuńǵysh ınklıýzıvti «Kúnshýaq» demalý jáne saýyqtyrý lageri ashyldy.
Budan basqa, tserebraldy sal aýrýymen jáne aýtızmmen aýyratyn balalar úshin psıhologııalyq, medıtsınalyq-pedagogıkalyq keńes berý, ońaltý ortalyqtary ashyldy. Jalpy, oblystaǵy 34 mektepke kedergisiz bilim berý ortasyn jasaý kózdelgen.
«Deni saý bolashaq» blogyn júzege asyrý úshin búkil oblys boıynsha 140 sport, oıyn jáne vorkaýt alańdary, sonymen qatar jabyq sport kesheni men 24 hokkeı korttary salynyp jatyr. Bul maqsatqa 385 mln teńgeden astam qarajat aýdarylmaq. Densaýlyǵynda kúrdeli kináráti bar balalar qymbat turatyn medıtsınalyq qyzmetterdi tegin alatyn bolady. Sonyń ishinde Ońtústik Koreıa men Túrkııaǵa emdelýge jiberiledi. Osy jylǵy tamyz aıynyń sońyna deıin 118 myń bala jazǵy demalyspen qamtylmaq. 10 myńnan asa bala Qazaqstannyń kıeli jerlerine tegin saıahattaý úshin múmkindik aldy. Taǵy júzdegen jas aqtóbelik Tatarstan, Ózbekstan, RF-nyń Orynbor oblystaryndaǵy saýyqtyrý jáne bilim berý lagerlerinde bolyp qaıtady. Sonymen birge Aqtóbeniń ózinde «Artekke» uqsaýy tıis «Ásem» jyl boıǵy lageri ashylǵan bolatyn. Budan ózge, «Baqytty bala» jobasy aıasynda kásiporyndar men memlekettik organdar jetim jáne ata-ana qamqorlyǵynsyz qalǵan myńdaǵan balany óz qaraýyna aldy. Olar balalardyń Turǵyn úı qurylys jınaq bankindegi esepshottaryn únemi toltyryp otyrady. Aıta keteıik, joba bastalǵaly beri 58 jetim bala baspanaly boldy.