Aqtóbe oblysynda 52 jolaýshysy qaza tapqan avtobýs isine qatysty sot bastaldy
AQTÓBE. QazAqparat - Búgin Yrǵyz aýdandyq sotynda avtobýsta órtenip ketken 52 jolaýshynyń isine qatysty aldyn ala otyrys bastaldy, dep habarlaıdy QazAqparat tilshisi.
«Búgin tańerteń saǵat 10-da Yrǵyz aýdandyq sotynda órtengen avtobýs isi boıynsha aldyn ala otyrys ótti. Maqsat Pernebekov, Nurjan Qyrǵyzbaev, Barat Tanatov, Tilepbaev jáne Perdebaevke qatysty qylmystyq is 9 shildede kelip tústi. Іs protsesi Yrǵyz aýdandyq sotynda ótip jatyr, sebebi Ózbekstannyń 52 azamaty qaza tapqan avtobýs osy óńirde órtengen bolatyn», - dedi Aqtóbe oblystyq soty baspasóz qyzmetiniń basshysy Anar Aıtjanova.
Órtengen avtobýstyń úsh júrgizýshisi, «Azııa tranzıt servıs» JShS quryltaıshysy men mehanıgi, jalpy 5 adam aıypty retinde tanylǵan.
Júrgizýshiler ustalǵan kúnnen bastap qamaýǵa alyndy. Olar eki nemese odan da kóp jolaýshynyń ólimine ákep soqqan kólik quraldaryn paıdalaný jáne abaısyzda eki nemese odan da kóp adamnyń ólimine soqtyrǵan órt qaýipsizdigi erejelerin buzǵany úshin aıyptalýda. Kompanııa qyzmetkerlerine eki nemese odan da kóp adamnyń ólimine ákep soqtyrǵan aqaýly kólik quralyn paıdalanýǵa jol bergenderi úshin, kommertsııalyq uıymdardaǵy mindetterine salǵyrt qaraǵany jáne resmı qujatty qoldan jasaǵany, qoldanǵany úshin aıyptaldy.
Avtobýs ıesi halyqaralyq deńgeıde izdestirý jarııalanǵan.
Eske salaıyq, 2018 jylǵy 18 qańtarda Yrǵyz aýdanyndaǵy Qalybaı aýylynyń tusynan ótetin Samara-Shymkent jolynda ishinde Ózbekstannyń 52 jolaýshysy bar avtobýs órtengendi. Jol apatynan Qazaqstannyń azamattary bolyp tabylatyn 3 júrgizýshi, Ózbekstannyń 2 azamaty aman qaldy.
