Aqtóbe oblysynda 3 halyqaralyq ótkizý beketi ashylady - Ońdasyn Orazalın
«Oblystaǵy ózekti máselelerdiń biri - jol. Sondyqtan bıyl osy máseleni sheshý, jergilikti joldardy damytý úshin bólinetin qarajat 1,3 ese ósti. Qazirgi tańda 43,6 mlrd teńge bólindi. Bul 500 shaqyrymnan astam jergilikti joldy jóndeýge múmkindik beredi. Kelesi jyly «Aqtóbe-Qandyaǵash», «Aqtóbe-Orsk» joldaryn jóndeý josparlanyp otyr. Onyń ústine Aqtóbe qalasynyń batys aınalma joly tolyq aıaqtalady, kópir paıdalanýǵa berilip, syrttan keletin kólikterdiń qalaǵa kirmeı syrt aınalyp ketýine tolyq múmkinshilik bolady», - dedi óńir basshysy.
Sonymen qatar oblys ákimi «Aqtóbe-Hromtaý-Qarabutaq-Ulǵaısyn», «Ortalyq-Batys» joldaryn salýǵa Úkimet qoldaý bildirip otyrǵanyn aıtty.
«Bul - ózekti máselelerdiń biri. Sebebi Aqtóbeniń erekshe kóliktik-logıstıkalyq áleýeti bar. Elbasy bastamasymen «Batys Eýropa - Batys Qytaı» dálizi tolyq iske qosyldy. Onyń ústine ońtústik kórshimizdiń (Ózbekstan) qarqyndy damyp, osy joldardy paıdalanýynyń arqasynda Aqtóbe oblysynyń ekonomıkalyq áleýeti kólik-logıstıka salasynda erekshe ósti. Sebebi Aqtóbe - Qazaqstan boıynsha ońtústik jaǵynan da, soltústik jaǵynan da shekarasy bar jalǵyz oblys. Batys Qytaıdan bolsyn, Ortalyq Azııadan bolsyn júk Aqtóbe oblysynyń aýmaǵynan ótedi. Oblys aýmaǵy arqyly júk tasymalynyń artqany qýantady. Degenmen, jol ınfraqurylymyn damytýǵa erekshe nazar aýdarýdy talap etedi. Osyǵan baılanysty Úkimet tarapynan tolyq qoldaý bar», - dedi O.Orazalın.
Munan bólek ol tranzıttik áleýetti damytý aıasynda oblysta úsh halyqaralyq ótkizý beketin ashý máselesi pysyqtalyp jatqanyn aıtty.
«Reseımen shekarada jumys istep turǵan «Áıteke bı - RF Soıýznye» jáne «Jırenqopa - Birinshi mamyr» beketteriniń mártebesin, Ózbekstanmen shekaradaǵy Bozoı aýyly jaǵyndaǵy beketti halyqaralyq deńgeıge kóterýdi josparlap otyrmyz», - dedi oblys ákimi.
