Aqtóbe oblysynda 160-tan astam júrgizýshi rýlge mas kúıde otyrǵan
AQTÓBE. QazAqparat – Aqtóbe oblysynda mas kúıinde kólik júrgizgender qatary azaıar emes. Jyl basynan beri 160-tan astam fakti tirkeldi, dep habarlaıdy QazAqparat tilshisi.
Aqtóbe qalasynyń Shaıkenov kóshesinde patrýldik polıtsııa qyzmetkerleri 38 jastaǵy júrgizýshiniń basqarýyndaǵy «Opel Zafıra» avtokóligin toqtatty. Saraptama qorytyndysy boıynsha onyń mas kúıde rýlge otyrǵany naqtylandy. Sonymen birge buǵan deıin kólik júrgizý quqyǵynan aıyrylǵany belgili boldy.
«Osy derek boıynsha QR QK-niń 346-baby 1-bóligi, ıaǵnı, «Kólik quraldaryn basqarý quqyǵynan aıyrylǵan jáne alkogoldik, esirtkilik nemese toksıkologııalyq masań kúıdegi adamnyń kólik quralyn basqarýy» baby boıynsha qylmystyq is tergelip jatyr. Jyl basynan beri polıtsııa qyzmetkerleri buryn kólik júrgizý quqyǵynan aıyrylǵan, mas kúıinde kólik júrgizgen 160-tan astam júrgizýshini anyqtady», - dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.
