Aqtóbe oblysynda 15 mektep salynyp jatyr
NUR-SULTAN. QazAqparat - Aqtóbe oblysynyń ákimi Ońdasyn Orazalın óńirde boı kóteretin áleýmettik nysandar týraly málimet berdi, dep habarlaıdy QazAqparat.
Ortalyq kommýnıkatsııalar qyzmetinde Aqtóbe oblysynyń áleýmettik-ekonomıkalyq damýy týraly baspasóz konferentsııasyn ótkizgen óńir ákimi Ońdasyn Orazalın jyl sońyna deıin 10 mektep qoldanysqa beriletinin aıtty.
«Halyqty sapaly medıtsınalyq qyzmetpen tolyq qamtamasyz etý úshin bıyl jalpy quny 900 mln teńgeden asatyn 8 densaýlyq saqtaý nysanyn salý josparlanyp otyr. Úsh aýysymdy jáne apatty mektepterdiń máselesin sheshý úshin 4800 oryndyq 15 bilim nysanynyń qurylysy júrip jatyr. Jyl sońyna deıin olardyń onyn iske qosý josparlanǵan. Nátıjesinde 5 úsh aýysymdy, 6 oryn tapshy, bir apatty jáne 3 eski mektep máselesi sheshiledi», - dedi ákim.
Onyń aıtýynsha, óńirde sport nysandarynyń qurylysy qyzý júrip jatyr.
«Óńirde sport nysandarynyń qurylysy jalǵasýda. Jyl basynan beri shańǵy-roller trassasy, Trıatlon parki jáne 2 dene shynyqtyrý-saýyqtyrý kesheni paıdalanýǵa berildi. Jyl sońyna deıin taǵy 3 aýdanda deneshynyqtyrý-saýyqtyrý keshenin iske qosý josparlanyp otyr», - dedi Aqtóbe oblysynyń ákimi.
